Më në fund Departamenti Amerikan i Shtetit ka vendosur të ndërhyjë zyrtarisht në zgjidhjen e krizës politike shqiptare. Javën që vjen do të mbërrijë në Tiranë për këtë çështje zv/ndihmës sekretari amerikan i Shtetit, Hoyt Brian Yee, i cili pritet të ketë takime me krerët e politikës shqiptare.
Vizita e zyrtarit amerikan vjen pas përpjekjeve të dështuara të ndërkombëtarëve për të arritur një kompromis mes palëve dhe pse u arritën të zhvillohen të paktën dy takime mes kreut të PD-së Lulzim Basha dhe Kryeministrit Edi Rama.
Hoyt Brian Yee pritet të ketë takime me presidentin e sapozgjedhur Ilir Meta, liderin e opozitës Lulzim Basha dhe kryeministrin Edi Rama.
Para zyrtarit amerikan tentuan në gjetjen e një zgjedhje zyrtarë të lartë të Brukselit së bashku me ambasadorin amerikan në Tiranë, Donald Lu. Zv/presidenti i Partisë Popullore Europiane David Mcallister propozoi një paketë marrëveshjeje më 25 prill, e cila u rrëzua nga kreu i opozitës.
Nuk dihet se çfarë propozimesh do të sjellë njeriu i Trump-it, por pas qëndrimit të tij opozita e cila e shikon veten si më afër administratës së re në Washington, nuk do të ketë justifikim për të kundërshtuar.
Kjo vizitë e nivelit të lartë nuk duket se gëzon shumë opozitën, pasi edhe zyrtari amerikan pritet të jetë në linjë me ndërkombëtarët e tjerë që kanë ndërhyrë për zgjidhjen dhe të gjithë kanë qenë njëzëri të qartë se opozita nuk duhet të bojkotojë zgjedhjet dhe duhet të votojë Vetingun në parlament.
Zyrtari amerikan ndërhyri edhe në zgjidhjen e krizës në vendin fqinj, Maqedoninë. Fill pas vizitës së tij në Shkup parlamenti zgjodhi kreun e ri, Talat Xhaferri./tesheshi.com
