Gazmend Morina, gazetar i portalit veriu.info është sulmuar me shufra hekuri nga Nexhat Dedia, asamblist i PDK-së në komunën e Mitrovicës dhe anëtar i Bordit në Infrakos, si dhe nga një person tjetër.
Sulmi ka ndodhur sot pasdite në Vushtrri, ndërsa Morina ishte me veturën e tij në qytet.
Lajmin për portalin tesheshi.com e ka konfirmuar edhe zëdhënësi i policisë për rajonin e Mitrovicës, Avni Zahiti, i cili tha se dy të dyshuarit momentalisht janë në polici duke u intervistuar si dhe pritet një vendim i prokurorit lidhur me këto dyshime.
Vetë gazetari Morina ka thënë për portalin tesheshi.com se Dedia dhe një person me emrin Labinot Krasniqi e kanë sulmuar me shufra hekuri të ngjashme me ato që përdor policia.
“Kam qenë në veturën time dhe të dy ata, Nexhati dhe Labinoti, më kanë sulmuar në shumë pjesë të trupit. Rastin e kam lajmëruar në polici”,- tha Morina.
Gazetari i veriu.info mendon se motiv kryesor i sulmit ndaj tij është shtyrë direkt nga drejtori i Trepcës Ahmet Tmava.
Ai shtoi se të shtunën ishte kërcënuar nga këta dy persona, pasi kishte shkruar në Facebook një status ndërsa ishte në Maqedoni, ku dy sulmuesit kanë qenë ulur me drejtorin Tmava.
Kërcënimin e asamblistit Dedia dhe dy personave tjerë Morina e kishte postuar edhe në Facebook, ndërsa dje e kishte raportuar edhe në polici.
Zëdhënësi Zahiti konfirmoi se gazetari Morina dje e ka paraqitur rastin e kërcënimit në polici, por nuk ka dhënë detaje se cilat kanë qenë veprimet e policisë pas këtij raportimi.
Morina tregon se personat që i kishte lajmëruar në polici se e kanë kërcënuar,sot e kanë sulmuar atë si shenjë hakmarrje.
Këtë “hakmarrje” ndaj tij nga ana e drejtorit Tmava, Morina e sheh si arsye të disa shkrimeve që ka shkruar në portalin e tij lidhur me keqpërdorimet në kombinatitn “Trepça”.
Asociacioni i Gazetarëve të Kosovës ka reaguar ndaj këtij rasti duke u shprehur se dënon sulmin ndaj gazetarit Gazmend Morina.
“AGK kërkon nga organet kompetente që të marrin masa urgjente ndaj sulmuesve dhe kërkon nga Kuvendi Komunal i Mitrovicës që të mbajë në përgjegjësi asambleistin Dedia. AGK është njoftuar se gjendja e gazetarit, pavarësisht lëndimeve, është e qëndrueshme dhe pas trajtimit mjekësor është liruar për në shtëpi”, thuhet në një komunikatë të AGK-së.
AGK e cilëson këtë si kërcënim ndaj fjalës së lirë dhe profesionit të gazetarisë. Sipas këtij asosacioni, ky është edhe një rast që tregon për vështirësitë e gazetarëve në përmbushjen e misionit profesional të tyre, për informimin rreth ngjarjeve dhe temave me interes qytetar./tesheshi.com/
