Një ditë pasi forcat proqeveritare e morën qytetin e Adenin dhe i nxorën jashtë tij husinjtë, rebelët shiitë, në të nuk vonuan të vijnë një sërë ministrash dhe zyrtarë të shërbimit inteligjent në mërgim. Kjo ishte hera e parë që ata shkelnin në qytetin strategjik që kur husinjtë e patën pushtuar atë.
Zyrtarët jemenas erdhën me helikopter nga Arabia Saudite, pasi ata u ngarkuan nga presidenti Abdurabbi Mansur Hadi për të punuar për kthimin e sigurisë dhe për përgatitjen e terrenit për rivënien në funksionim të institucioneve shtetërore në Aden.
Forcat e Rezistencës Popullore, mbështetëses kryesore të presidentit Hadi, rimorën një ditë më parë aeroportin, të ndihmuar edhe nga përforcimet me luftëtarë të stërvitur dhe të pajisur në Arabinë Saudite.
Rebelët bombarduan gjatë tërheqjes rajone të banuara në veri dhe në lindje të Adenit, e po ashtu goditën dhe depozitat e një rafinerie nafte. Ndërsa nuk ka njoftime për humbjet në radhët e husinjve, gjatë sulmeve të tyre humbën jetën 12 civilë, e 105 të tjerë u plagosën.
Të premten, me iniciativën e OKB-së, nisi një armëpushim humanitar pesëditor mes palëve ndërluftuese, për t’u ardhur në ndihmë civilëve me furnizime me nevojat bazë, por që nuk u respektua për asnjë çast.
Qyteti-port i Adenit është bërë prej muajsh qendër e luftimeve mes husinjve dhe forcave proqeveritare, për të përfunduar së fundi në duart e mbështetësve të Abdurrabi Mansur Hadit, presidentit në mërgim. /tesheshi.com/
