Zëdhënësi i qeverisë izraelite Eylon Levy i përshkroi tunelet e përdorura nga Hamas si unike, ndërsa një gazetë britanike citoi një zyrtar tjetër të thoshte se shkatërrimi i tyre në Gaza është mision i pamundur.
Levy tha se qeveria e Benjamin Netanyahut është e përkushtuar për të arritur qëllimet e luftës, duke përfshirë lirimin e pengjeve dhe përfundimin e sundimit të Hamasit. Në këtë kontekst, gazeta britanike Financial Times citoi një zyrtar izraelit, i cili tha se shkatërrimi i tuneleve në Gaza është si fantashkencë, pavarësisht burimeve që qeveria izraelite po shpenzon për të gjetur një zgjidhje për të arritur këtë qëllim.
Zyrtari zbuloi se Tel Avivi mori 320 milionë dollarë ndihmë nga Amerika vetëm për të shkatërruar tunelet, por të gjitha pa dobi. Ai tha gjithashtu se Hamasi kishte mësuar nga sulmet dhe luftërat e mëparshme të nisura nga okupimi në Rripin e Gazës për të shkatërruar tunelet.
Zyrtari, i cili nuk pranoi të identifikohej, e përshkroi atë që Hamasi ka ndërtuar nën Rripin e Gazës si diçka që “shkon përtej përshkrimit të tuneleve dhe duket më shumë si qytete nëntokësore”.
Tunele qindra kilometra të gjatë
Ai tha se vlerësimet ushtarake izraelite tregojnë se rrjeti i tuneleve të Hamasit në Gaza është më i madh se rrjeti i nëndheshëm i Londrës.
Wall Street Journal citoi zyrtarë amerikanë të thoshin se Izraeli kishte ngritur një sistem të madh pompash që mund të përdoreshin për përmbytjen e tuneleve të përdorura nga Hamasi nën Rripin e Gazës.
Forcat okupuese kanë pretenduar se kanë gjetur më shumë se 800 tunele në Rripin e Gazës që nga fillimi i operacionit tokësor në vazhdim dhe se kanë shkatërruar 500 prej tyre duke përdorur eksploziv për të shkatërruar disa kilometra tunele.
Përpara agresionit aktual izraelit në Gaza, i cili hyri në javën e tij të tetë, Hamasi pretendonte se kishte qindra kilometra tunele për t’i shërbyer dhe mbrojtur bazat e tij operacionale. /tesheshi.com/
