Ka rënë më në fund dhe miti i Shqipërisë si “kështjellë e pamposhtur” ndaj koronavirusit.
Sipas informacionit zyrtar të dhënë nga Ministria e Shëndetësisë, fjala është për babë e bir të kthyer nga Italia nëpërmjet pikës së kalimit të Hanit të Hotit.
“Dy qytetarët e konfirmuar me koronavirusin e ri, babë e bir, 54 vjeç dhe 28 vjeç kanë qëndruar disa ditë në Firence dhe kanë udhëtuar në rrugë tokësore nga Firence drejt Tiranës, nëpërmjet pikës së Hanit të Hotit me makinë personale. Menjëherë pas shfaqjes së shenjave klinike dhe lajmërimit të urgjencës kombëtare në nr.127 i janë marrë mostrat, të cilat u konfirmuan mbrëmjen e sotme nga laboratori i virologjisë në IShP.
Dy rastet e konfirmuara me COVID-19 janë në gjendje të stabilizuar dhe po trajtohen në spitalin infektiv. Ndërkohë strukturat e shëndetit publik po realizojnë hetimin epidemiologjik dhe marrjen e mostrave të kontakteve.
marrjen e mostrave të kontakteve”, thuhet në njoftimin zyrtar.
“Strukturat tona të urgjencës kombëtare dhe ISHP janë duke ndjekur protokollin klinik dhe epidemiologjik për të dy rastet.CMSHMS përsërit thirrjen për qytetarët që kanë udhëtuar nga vende të prekura dhe ndjejnë simptoma të ngjashme me gripin, të telefonojnë në nr.127, ku mjekët tanë do t’i përgjigjen çdo rasti”, sqarohet më tej.
Ndërkohë, si reagim i parë nga qeveria është ai i zv/kryeministrit Braçe.
“Tani duhet qetësi, vetëkontroll, disiplinë për të zbatuar çdo protokoll dhe çdo rregull të shpallur, vendosmëri për të mos lejuar përhapjen kudo!
Çdokush që ka hyrë nga Italia në Shqipëri dy javët e fundit dhe ka shenja të gripit, të telefonojë në numrin 127.
Çdokush që ka hyrë nga Italia ne Shqipëri gjatë dy javëve të fundit duhet të vetëkarantinohet për 14 ditë.
Pjesa tjetër është higjena, higjena, higjena!
Lani duart shpesh dhe për 40 sekonda me ujë e sapun, dizinfektoini me solucione me bazë alkoolin.
Të gjitha vendet me grumbullime të mëdha, posaçërisht shkollat, duhet te 100 fishojnë kujdesin ndaj higjenës; mos prekni gojën, hundën e syte më duar të palara, virusi hyn në trup prej tyre!
Mbroni fëmijët dhe të moshuarit! Është detyrë!”, shkruan Braçe. /tesheshi.com/
