Zyra e Kombeve të Bashkuara për të drejtat e njeriut, u ka bërë thirrje disa qyteteve turistike franceze që të tërheqin ndalimin veshjes së burkinit, duke e quajtur vendimin “reagim të marrë” i cili nuk ka përmirësuar sigurinë, por përkundrazi ka nxitur intolerancën fetare.
Gjykata më e lartë administrative e Francës të premten ka pezulluar ndalimin e burkinit në një qytet, me arsyetimin se shkel liritë themelore.
“Komisioneri i Kombeve të Bashkuara për të drejtat e njeriut, Zeid Ra’ad Al Hussein e ka mirëpritur këtë vendimi kundër qytetit të Villeneuve-Loubet”, ka thënë zëdhënësi i tij Rupert Colville. Disa qytete tjera franceze kanë ndalesa të tilla akoma në fuqi.
“U bëjmë thirrje autoriteteve në të gjitha qytetet bregdetare franceze të cilat kanë adaptuar ndalesa të ngjashme, që të marrin parasysh vendimin e Gjykatës Administrative se ndalimi përbën një shkelje të paligjshme të drejtave themelore”, tha ai në një konferencë, duke kërkuar shfuqizimin e menjëhershëm.
“Këto ndalesa janë tejet diskriminuese, dhe si të tilla duhet të shfuqizohen para se të përfundojë sezoni veror”, ka thënë Colville.
“Sinqerisht është një reagim i marrë, karshi situatës me të cilën jemi ballafaquar, pra karshi sulmeve terroriste. Këto masa nuk bëjnë asgjë për të përmirësuar rendin publik”, tha ai, duke shtuar se dekrete të këtilla vetëm sa ndezin intolerancën fetare dhe stigmatizimin e muslimanëve në Francë, veçanërisht ndaj femrave.
“Ato mund të dëmtojnë përpjekjet për të luftuar dhe parandaluar ekstremizmin e dhunshëm, i cili varet nga bashkëpunimi dhe respekti i ndërsjellë në mes të komuniteteve”.
“Ndalimet nuk kanë të bëjnë asgjë me shëndetin apo higjienën, siç është argumentuar nga disa zyrtarë francez, ka thënë Colville. /tesheshi.com/
