Zyra e OSBE-së në Tiranë ka tentuar të korrigjojë deklarimet e kreut të saj ambasadori Bernd Borchardt, sipas së cilit, në qarkullim janë 2 miliard euro me të cilat mund të blihen zgjedhjet e qershorit, deklaratë e bërë para gazetares Ilva Tare.
Por OSBE thekson se dy miliardë eurot e cituara i përkasin vitit 2013. Për më tepër, ajo vlerëson luftën kundër kanabisit, duke nënvizuar vitin 2016, ku mbi 2.5 milionë rrënjë janë shkatërruar.
Dhe si për ta vulosur qëndrimin e saj, prezenca e OSBE-së në Tiranë iu bën thirrje partive politike që të mbajnë larg fushatës elektorale dy miliardët e vitit 2013, por edhe paratë e tjera të pista që mund të vijnë nga kanabisi i ri.
Kjo që ka ndodhur me prezencën e OSBE-së dhe kreun e saj, përbën një precedent të rrallë në qëndrimet diplomatike, që mund të kenë ardhur o nga gabime njerëzore –siç mund të ketë qenë përkthimi ose keqartikulimi – ose nga rrëshqitje diplomatike momentale. /tesheshi.com/
