Ka ardhur menjëherë reagimi i qeverisë së Iranit ndaj Tiranës zyrtare, pikërisht pas takimit të kryeministrit Edi Rama me zv.presidentin e SHBA Mike Pence dhe telefonatës me Sekretarin e Shtetit Rex Tillerson, ku është biseduar për intensifikimin e muxhahidinëve iranianë në Tiranë.
Numri dy i diplomacisë së Iranit, Majid Takht Ravanchi, ka deklaruar për Albanian Daily News, një portal shqiptar në gjuhën angleze, se Tirana zyrtare po strehon njerëz që kanë kryer krime të tmerrshme dhe urrehen nga populli iranian.
Albanian Daily News, i ka dhënë shumë hapësirë qëndrimeve të qeverisë iraniane prej kohësh dhe duket se ka një marrëdhënie konstante të kësaj medie me strukturat qeveritare në Teheran.
Në intervistën e tij, zv.ministri i jashtëm iranian ka rritur dozën e akuzave ndaj qeverisë shqiptare duke theksuar se “nuk mund të ketë terrorist të mirë apo të keq. Të gjithë terroristët janë të rrezikshëm, sepse ata nuk duan të shikojnë t’u ndodhin gjëra të mira njerëzve. Dallimi midis një terroristi të mirë apo të keq, mendoj se të keqdrejton përfundimisht.
Nuk duhet të pranojmë ndonjë nocion që do të kategorizonte një terrorist të mirë kundrejt një terroristi të keq, organizatave të mira terroriste kundrejt organizatave te këqija terroriste”.
Organizata të cilës i referoheni ka qenë përgjegjëse për vrasjen e më shumë se 17.000 iranianëve të pafajshëm. Ky fakt duhet mbajtur mirë në mend. Asgjë nuk mund ta fshehë këtë fakt.
Ravanchi, iu drejtua hapur qeverisë shqiptare, natyrisht edhe amerikanëve që janë pjesë e operacionit në mbështetje të opozitës së Iranit, kur thotë se “Kështu që, kushdo që merret me këta njerëz, duhet të njohin faktin se ata kanë kryer kaq shumë krime dhe se urrehen nga iranianët. Kjo është diçka që duhet mbajtur mend nga të gjithë ata njerëz që janë në kontakt me këtë grup”.
/tesheshi.com/
