Nuk kanë të ndalur problemet për shtetin maqedonas. Së fundmi, në një intervistë për Radio Evropa e Lirë, zv/kryeministri për eurointegrime, Fatmir Besimi, ka sqaruar se Maqedonia mund të rrezikojë që edhe kësaj rradhe të mos fitoj rekomandimin për anëtarësim në Bashkimin Evropian.
“Nëse nuk respektohet marrëveshja politike e 2 qershorit dhe nëse nuk punojmë që në tërësi t’i plotësojmë urgjentisht reformat mund të ndodh edhe të mos fitojmë rekomandimin”, deklaroi Fatmir Besimi.
Besimi nuk e ka komentuar nevojën për ligjin që u propozua nga Talat Xhaferi lidhur me përgjimet e bisedave telefonike. Sipas tij, është temë që bisedohet në mes partive dhe është pjesë e dialogut politik. “Partitë politike në dialog do të sjellin ligj në raport me këtë çështje”, tha Besimi.
Në lidhje me çështjen e emrit patjetër se duhet një proces më intensiv, ka theksuar Besimi. Megjithatë, ai vlerëson se në këtë problematikë duhet edhe aktivitet i palës tjetër.
“Në raport me reformat, gjithsesi se edhe në atë pjesë duhet të tregohet përparim, por duke pasur parasysh gjendjen politike në vend, kjo ka reflektuar edhe në disa pjesë të reformave, prandaj këtu tash në paket hyjnë edhe aktivitetet e dialogut politik. Kemi tre çështje kyçe, njëra është e hapur, problemi i emrit, e dyta paketi me reforma dhe e treta reformat që dalin nga marrëveshja politike. /tesheshi.com/
