Agjencia Reuters njofton se Zvicra do të ndjekë të njëjtën mënyrë veprimi si Danimarka ndaj refugjatëve. Agjencia i referohet transmetuesit SRF në Zvicër, që ka lajmëruar se refugjatët që arrijnë në vend do duhet t’i dorëzojnë sendet me vlerë mbi 1.000 franga zviceriane për të mbuluar shpenzimet e tyre.
SRF-ja ka cituar autoritetin shtetëror të emigracionit, SEM, ta justifikojë masën me faktin se ligji u bën thirrje azilkërkuesve dhe refugjatëve të kontribuojnë me sa është e mundur për shpenzimet e procedurës së aplikimit të tyre dhe të sigurimit të asistencës sociale.
Një zëdhënëse e SEM-it i ka deklaruar transmetuesit SRF se nëse dikush largohet vullnetarisht brenda shtatë muajve, ai mund t’i rimarrë paratë e lëna. Ndryshe ato do të mbulojnë shpenzimet e bëra për ta.
Sipas raportit të mësipërm, refugjatët që fitojnë të drejtën për të qëndruar dhe punuar në Zvicër do duhet të dorëzojnë 10 për qind të pagës së tyre për dhjetë vite, derisa të ripaguajnë 15.000 franga për shpenzimet.
Nisma daneze për marrjen e sendeve me vlerë të refugjatëve është pritur me kritika të ashpra, posaçërisht nga organizma të mbrojtjes së të drejtave të njeriut. /tesheshi.com/
