Zv.presidenti i SHBA, Joe Biden mbërrin sot në mbrëmje për vizitë në Kosovë, të dytën pas vizës së majit 2009, pak më shumë se një vit pas shpalljes së pavarësisë.
Sonte në mbrëmje Biden mbërrin në Aeroportin e Prishtinës, ndërsa nesër do të zhvillojë takimet zyrtare.
Ambasada e SHBA në njoftimin e dërguar bën të ditur se, nënpresidenti Joe Biden dhe Dr. Jill Biden do të zhvillojë takime dypalëshe me presidentin, Hashim Thaçi dhe kryeministrin, Isa Mustafa.
Gjithashtu, nën patronatin e qeverisë së Kosovës, nënpresidenti Joe Biden dhe Dr. Jill Biden do të shkojnë për vizitë afër kampit Bondsteel për të marrë pjesë në ceremoninë e përurimit të emërimit të rrugës kushtuar djalit të tyre të ndjerë, Joseph R. “Beau” Biden, III, bën të ditur Ambasada e SHBA në Kosovë.
Në vizutën e parë, në 21 Maj 2009, zv. presidenti amerikan, Joe Biden në takim me drejtuesit më të lartë të vendit në Prishtinë ka ritheksuar qëndrimin e SHBA-së se pavarësia e Kosovës përbën proces të pakthyeshëm.
“Shtetet e Bashkuara të Amerikës e kanë bërë të qartë tashmë se njohja e pavarësisë së Kosovës përbën proces të pakthyeshëm. Kjo nuk do të ndryshojë”, ka thënë ai pas takimit me atëherë presidentin Fatmir Sejdiu e kryeministrin Hashim Thaçi.
“Së dyti, një Kosovë e tërë dhe e bashkuar është kusht minimal, për aq sa i përket qëndrimit të SHBA-ve. Një Kosovë e bashkuar dhe e pandarë është absolutisht kusht esencial dhe themelor”, ka theksuar Biden.
“Gjëja e tretë që dua ta potencoj është se mendoj se qeveria ka arritur një progres të konsiderueshëm gjatë vitit të parë. Progresi që qeveria e ka arritur brenda një viti është i jashtëzakonshëm dhe unë mendoj se një element qenësor i suksesit të vazhdueshëm të qeverisë dhe i faktit që kjo qeveri është përqafuar nga bota është natyra vërtetë shumetnike e kësaj shoqërie, e këtij vendi dhe e kësaj qeverie”, ka thënë Biden.
Zv.presidenti Biden u dekurua me Medaljen e Lirisë nga presidenti i asaj kohe i Kosovës, Fatmir Sejdiu.
Kjo dekoratë mirënjohjeje u jepet personaliteteve të njohura të botës për meritat e tyre për mbrojtjen e lirisë së Kosovës dhe për ndërtimin e vendit të lirë të Kosovës, si dhe për integrimin e tij në bashkësinë e kombeve të lira të botës. /tesheshi.com/
