Zv.kryeministrja e dorëhequr, Ledina Mandija, zhvilloi sot takime me përfaqësues të zyrës së Bashkimit Evropian në Shqipëri, Këshillit të Evropës dhe OSBE-së.
Në mbyllje të mandatit të Task-Forcës, Mandija iu dorëzoi personalisht partnerëve ndërkombëtarë materialin përmbledhës për zgjedhjet, shoqëruar me të gjitha anekset, informacionet dhe raportimet zyrtare të Ministrive.
Ajo falënderoi partnerët ndërkombëtarë për ekspertizën e tyre të çmuar dhe rolin e mbështetjen e tyre të vazhdueshme gjatë funksionimit të Task-Forcës.
Partnerët ndërkombëtarë përgëzuan zv.kryeministren për punën e kryer gjatë drejtimit të Task-Forcës dhe për seriozitetin e pasqyrimit të të dhënave duke shpresuar që ky raport do të shërbejë për ndjekjen e mëtejshme të problematikës së trajtuar në të nga organet shtetërore kompetente.
Zgjedhjet e lira dhe të ndershme janë themeli i një sistemi demokratik dhe për këtë arsye Mandija shprehu besimin se ky raport është një pikë referimi për kryerjen e ndryshimeve të nevojshme në kuadrin ligjor me qëllim përmirësimin e standardit të zgjedhjeve dhe nxitjen e subjekteve zgjedhorë për të hequr dorë njëherë e mirë nga fenomeni i shëmtuar i shitblerjes se votës dhe përdorimit të elementëve dhe grupeve kriminale në zgjedhje. /tesheshi.com/
