Zv/kryeministrja serbe, Zorana Mihajloviç, u bëri thirrje të gjitha vendeve të Ballkanit Perëndimor që të hartojnë një strategji të përbashkët të zhvillimit ekonomik për ato vende.
Mihajloviç, e cila është edhe ministre e Ndërtimit, Transportit dhe Infrastrukturës, tha se kjo do të ishte një nga temat e bisedimeve me liderët shqiptarë dhe të Maqedonisë Veriore, Edi Rama dhe Zoran Zaev në fillim të tetorit në Beograd, të iniciuar nga presidenti serb Aleksandar Vuçiç, dhe me temën e formimit të “Shengenit të vogël”.
“Secili prej vendeve të Ballkanit Perëndimor është ende mjaft i vogël për të tërhequr investitorë globalë, pa të cilin është e pamundur të sigurohet një rritje e qëndrueshme ekonomike. Por së bashku ne mund të jemi më konkurrues, si me Bashkimin Evropian, ashtu edhe me tregjet e tjera botërore. Kjo u demonstrua qartë nga çështja e hapjes se fabrikaës së re të Wolkswagen-it”, tha Mihajloviç,.
Ajo shtoi se nuk bëhej fjalë për krijimin e një “Jugosllavie të re” ose “një Ballkan të shkëlqyeshëm”, por aplikimin e një logjike të pastër ekonomike, e cila mund të sigurojë një jetë më të mirë për qytetarët.
“Ajo që secili prej nesh duhet të bëjë, është që të heqë të gjitha pengesat e brendshme doganore dhe kufitare për transportin e mallrave dhe shërbimeve midis Serbisë, Shqipërisë dhe Maqedonisë Veriore. Mund të kemi gjithashtu mbështetje nga Komunitetet e Transportit, selia e të cilave u hap kohët e fundit në Beograd”, theksoi ministrja.
Mihajloviç tha se do të ishte shumë mirë që të gjitha vendet e Ballkanit Perëndimor të kenë një politikë të harmonizuar të infrastrukturës.
“Ndoshta hapi i parë në këtë drejtim mund të jetë formimi i një rrjeti rajonal të ngarkuesve të automjeteve elektrike, sepse është një teknologji që sigurisht është e ardhmja, si dhe një tarifë unike në autostradat, e cila do t’u mundësonte qytetarëve tanë që të kalojnë rampat e taksave pa u ndalur”, deklaroi ajo.
Këtë që thotë numri 2 i qeverisë serbe u konfirmua dhe nga kryeministri Rama, teksa në një intervistë nga SHBA tha: “Me Presidentin serb dhe kryeministrin Zaev u dakordësuam për t’u takuar për një bashkëpunim mes tre vendeve, takim që është hap për të nxitur dhe të tjerët që të bashkohen. Takimi ka rëndësi nëse biem dakord për heqjen e kufijve për njerëzit, mallrat, biznesin dhe për investitorët për të investuar në rajonin tonë pasi kemi nevojë për një treg më të gjerë”. /tesheshi.com/
