Arian Ndoja është prokurori i bandave, denoncuar pa emër një ditë më parë nga kryeministri Rama, e dhënë të kuptuar se është fjalë pikërisht për të, një ditë më pas nga zv.kryeministri Braçe. Ky i fundit ishte në një seancë gjyqësore në Durrës, aty ku është ngritur akuzë ndaj Liridon Pulës, drejtorit të Kadastrës së Durrësit, në një dosje hartuar nga Ndoja.
“Pa më të voglin diskutim që është akti final i një historie të gjatë gati një mujore, presioni, shantazhi kriminal mbi punonjësin që sot ishte me pranga në sallën e gjyqit. Presioni kriminal që nuk është bërë për çështjen në fjalë për të cilën është akuzuar por për pallate monsturuoze që duhet të legalizohen dhe të regjistrohen në këtë qytet. Eshtë bërë jo për çështjen, por presion në mënyrë të qartë për disa vjedhje të tjera, të mëdha shumë të rënda, në kohë të ndryshme në zonën e Gjirit të Lalëzit. Ai punonjësi i shtetit atje, sipër pavarësisht shantazhit në të cilin ka qenë, ka refuzuar të bëhet pjesë e këtyre veprimeve kriminale dhe unë dyshoj shumë pas asaj që dëgjova përreth një orë e gjysmë që e gjithë akzua e ngritur me të është e paprovuar , por ka edhe lajthitje marramendëse që u referohen rregulloreve që sot nuk janë në fuqi që i kërkojnë drejtuesit të Kadastrës të sillet si drejtor i institucioneve që kanë qenë më parë”, tha Braçe, duke aluduar në prokurorin e çështjes Ndoja.
Braçe vijoi me tej duke thënë “Reforma në drejtësi duhet të marrë para gjithë këtë pisllëk zhuli. Ky është vetëm një rast. Imagjino sa raste ka që qytetarët merren në qafë nga zhuli dhe krimi që është instaluar në sistemin e drejtësisë. Janë disa njerëz që nuk kanë kaluar në vetting që duhet të kapërcejnë çdo lloj radhe për të kaluar në veting për t’i dhënë fund krimit përkundrejt interesit publik. Sipas logjikës së këtij prokurori, çdo lloj drejtuesi mund të rrezikojë të përfshihet në të njëjtën situatë”. /tesheshi.com/
