Zv/Kryeministri Erion Braçe shprehu ftohtësi ndaj zgjedhjeve të 30 qershorit, ku mazhoranca u detyrua të garojë e vetme për shkak të bojkotit opozitar. Duke folur në Top Talk të TCH, Braçe tha se kjo situatë nuk është aspak komode e jo e kundërta.
“Nuk është komode, absolutisht nuk është komode. Të paktën unë jam mësuar ndryshe, por besoj edhe kolegët e mi e ndjejnë që kjo situatë nuk është komode. Duke nisur që nga zgjedhjet e 30 qershorit ku konkurrenca ishte e kufizuar tej mase. Unë mendoj që një palë zgjedhje me konkurrencë akoma edhe më efektive do të kishin sjellë një mobilizimim edhe më të madh nga pikëpamja organizative e Partisë Socialiste, por do t’i bënte mirë edhe vetë PS-së në formësimin e një alternative edhe më të qartë vendore”, deklaroi Braçe.
Nga ana tjetër, Braçe dha garanci se nëse ndodh që Gjykata Kushtetuese të shprehet kundër 30 Qershorit, siç opozita ka ankimuar me pretendimin se është datë e paligjshme, mazhoranca sigurisht që do e njohë verdiktin, gjë që sipas tij nuk do e bëjë opozita, nëse verdikti i do jetë kundër saj.
“Po patjetër, do zbatojmë vendimin e gjykatës Kushtetuese as nuk diskutohet. Por Gjykata Kushtetuese ka dy opsione, njërin që të marri parasysh ankesën që ka bërë Kryetarja në largim e Bashkisë Shkodër dhe tjetri eshte që të njohi legjitimitetin e zgjedhjeve. Pyetja është, po ata të tjerët a do ta njohin legjitimitetin e zgjedhjeve të dalë nga një vendim i Gjykatës Kushtetuese. Ne në të gjitha rastet kemi sjelljen institucionale. Pra ne në të gjitha rastet themi se do njohim vendimin e Gjykatës Kushtetuese. Nga pala tjetër nuk ka një vendim të tillë, madje unë jam i bindur që po i paraprihet thënies që është Gjykata private, personale e Edi Ramës”, tha Braçe, raporton TCH. /tesheshi.com/
