Zëvendës kancelari gjerman Robert Habeck mbrojti të martën planin e qeverisë për t’i dhënë fund përdorimit të energjisë bërthamore deri në fund të këtij viti, duke argumentuar se mbajtja në punë e reaktorëve të mbetur do të ishte e ndërlikuar dhe do të bënte pak për të zgjidhur problemet e shkaktuara nga një mungesë e mundshme e gazi natyror.
Opozita gjermane i ka bërë disa herë thirrje qeverisë që të mbajë në funksion tre reaktorët bërthamorë të mbetur pas dhjetorit, për shkak të frikës se Rusia mund të ndalojë plotësisht furnizimin me gaz.
Megjithatë, zyrtarët e qeverisë pohojnë se gazi natyror nuk është aq faktor në prodhimin e energjisë elektrike, sa në fillimin e proceseve industriale dhe ngrohjes.
Tre reaktorë të mbyllur
“Energjia bërthamore nuk na ndihmon fare këtu. Ne kemi një problem me ngrohjen ose një problem industrial, por jo me energjinë elektrike, të paktën jo në të gjithë vendin”, tha në një shtyp zv.kancelari Habeck, i cili është edhe kreu i Ministrisë së Marrëdhënieve Ekonomike, Veprimit Klimatik dhe Energjisë.
Gjermania mbylli tre reaktorë bërthamorë në dhjetor dhe tre të tjerët do të ndërpresin prodhimin në fund të këtij viti si pjesë e një plani afatgjatë për të hequr gradualisht termocentralet konvencionale në favor të energjisë së rinovueshme. /tesheshi.com/
