Kryeministri Rama u zotua përpara ministrit të Brendshëm të Francës, Gerard Collomb i cili ndodhet në Tiranë për vizitë zyrtare, se do të vazhdojë me ndërgjegjësimin e shqiptarëve se kërkesat për azil janë një rrugë pa krye. Në një dalje të përbashkët për mediat, në fokus të së cilës ishte informimi për hapat e reformës në Drejtësi, Rama preku edhe temën që shqetëson më së shumti autoritetet e Bashkimit Europian, atë të azilantëve nga Shqipëria dhe vende të tjera të Ballkanit Perëndimor.
“Ne do punojmë për të vazhduar t’ua bëjmë të qartë qytetarëve shqiptarë se rruga e azil-kërkimit jo vetëm që përbën në vetvete një rrugë të paligjshme por dhe një rrugë pa krye. Siç dëshmojnë vetë ata që në fund të kësaj rruge janë detyruar të rikthehen, përkthehet në kosto individuale e financiare. Vullneti ynë është i plotë dhe procesi i frenimit që ka nisur do të vazhdojë deri në fund”, tha Rama.
Kryeministri Edi Rama shprehu besimin që Shqipëria do të marrë një rekomandim të pakushtëzuar nga Komisioni Europian dhe më pas do të çelë negociatat me BE.
Por a e ka kjo ambicje e kryeministrit mbështetjen e Francës?
“Duhet të bindim vendet e BE, vullneti i Shqipërisë është ogur i mirë dhe do të na ndihmojë ne për të ardhmen e Shqipërisë”, tha Collomb. /tesheshi.com/
