Kyeministri i Maqedonisë, Zoran Zaev, ka deklaruar sot se qeveria e këtij vendi do të zbatojë këresën e partive shqiptare për një hetim ndërkombëtar mbi ngjarjen e Kumanovës të verës së vitit 2015, ku në “Lagjen e Trimave” u vranë 22 persona, 8 policë dhe 14 pjesëtarë të grupit të armatosur.
Zoran Zaev deklaroi sot se ekspertë ndërkombëtarë do të vijnë në Maqedoni për të hetuar ngjarjen që në themel të saj, duke marrë parasysh edhe kërkesat e avokatëve mbrojtës të të pandehurve.
“Deri më tani kemi pasur informacione dhe bisedime me përfaqësues të bashkësisë ndërkombëtare në lidhje me modalitetet se si do të mundësohet hapja e hetimit ndërkombëtar.
Nuk duam të kemi dilema për çështje të paqarta e të cilat janë në interes të qytetarëve. Besojmë se bashkë me bashkësinë ndërkombëtare do të gjejmë mundësinë për hapjen e një hetimi ndërkombëtarë për këtë rast”, tha Zaev.
Qeveria e Kosovës ka miratuar vendimin për ndarjen e një fondi për familjet e të vrarëve dhe të dënuarve nga Kosova në rastin Kumanova.
Për çdo familje do të ndahen nga 10 mijë euro, ndërsa paratë do të lëshohen në xhirollogari të Këshillit të familjeve të të dënuarve.
Për rastin “Kumanova” u dënuan 37 persona prej të cilëve 8 u dënuan me burg të përjetshëm, 4 u liruan nga akuza ndërsa të tjerët u dënuan me 746 vjet heqje lirie. Në mesin e të dënuarve 19 persona janë nga Kosova.
/tesheshi.com/
