Nga Mensur Krasniqi
Lideri i LSDM-së Zoran Zaev, nuk përjashton mundësinë që Prokurorja Speciale e sapo emwruar, t`i hetojë dhe shqyrtojë rastet e “Kumanovës”, “Monstrën” dhe skandalin e fundit me “Magyar Telekom”.
Sipas tij, kompetencat e Prokurorit Special do jenë të gjëra në mënyrë që të hetojë gjithcka që përmendet në përgjimet.
“Nëse ka biseda telefonike për “Monstrën”, që e dimë të gjithë se ka biseda të tilla nga përgjimet, atëherë ato rast do të përfshihet në punën e Prokurorit Special. Nëse ka biseda për “Magyar telekom”, atëherë edhe ajo do jetë lëndë shqyrtimi nga ana e Prokurorit special”, tha Zaev.
Në pyetjen se a ekzistojnë biseda të incizuara telefonike ku përmendet rasti me “Magyar telekom”, Zaev tha që këtë do ia lë Prokurorisë.
Zaev është pyetur për këto çështje në vazhdimësi edhe gjatë fushatës së publikimit të përgjimeve, por asokohe deklaronte se çështja ishte e ndjeshme, por premtonte se në rast se nuk publikohen në konferenca ato do t’u jepeshin institucioneve gjyqësore që nuk do të ishin nën kontrollin e Gruevskit dhe bashkëpunëtorëve të tij.
Se a do të zbardhet e vërteta për rastin “Monstra” dhe rastin e “Kumanovës”, mbetet një enigmë, të vërtetën e së cilës do ta rrëfejë koha. /tesheshi.com/
