Nga Mensur Krasniqi
Asgjë nga takimi i liderëve partiak të Maqedonisë me përfaqësuesit ndërkombëtarë në Vjenë. Pas ultimatumit që dha lideri i partisë më të madhe opozitare në Maqedoni, LSDM-së, Zoran Zaev se nuk do të merr pjesë në takimin e Vjenës që e thirri eurokomisioneri Johanes Hahn me 4 liderët të katër partive më të mëdha politke, nënshkruese të Marrëveshjes së Përzhinos, nëqoftëse presidenti i shtetit Gjorgji Ivanov nuk e tërheq vendimin për falje të politikanëve të inkriminuar të pushtetit, dhe shtyerjen e zgjedhjeve të parakohëshme më 5 qershor, i njëjti takim ashtu siç është informuar nga zyrat e BE-së që duhej të mbahet nesër është anuluar.
Zëdhënësja e Komisionit Evropian, Maja Koçijançiç ka shprehur keqardhje për mossuksesin e mbajtjes së bisedave në Vjenë, duke paralajmëruar se informata plotësuese do japin në njoftim zyrtar të KE-së.
“Ne vazhdimisht përsërisim se mosinplementimi i Marrëveshjes së Përzhinos do të ketë pasoja të rënda për vendin. Ndiejmë keqardhje të thellë për këtë hap të papjekshëm të Shkupit, të cilat do të çojnë vendin larg nga aspiratat për anëtarësim në Bashkimin Evropian”- tha Koçijançiç.
Po si e komentojnë analistët në Maqedoni dështimin e këtij takimi, kush janë fajtorët kryesorë për shkaktimin e krizës politike, dhe cila është rrugëdalja nga ky “qorrsokak” i Maqedonisë, për portalin tesheshi.com flasin ish-deputeti Ismet Ramadani dhe gazetari, njëkohësisht njohës i mirë i rrethanave politike në vend, Afrim Tanallari.
Ismet Ramadani, ish-deputet: Pa Zaevin takimi s’do kishte kuptim
“Unë mendoj se ndërkombëtarët e kanë vlerësuar se pa liderin e opozitës LSDM-së, Zoran Zaevin, nuk do të kishte asnjë farë kuptimi vet takimi në Vjenë. Pra e gjithë situata mund të vlerësohet se është apo nuk është për të shkuar në zgjedhje varret prej vlerësimeve dhe kushteve që i përcakton opozita, sepse tek e fundit opozita nuk është vetëm LSDM, por opozita përfshin një spektër më të gjërë edhe sektorin civil bashkë me opozitën shqiptare. Andaj përfaqësuesit ndërkombëtarë si duket definitivisht kanë ardhur në përfundim se nuk do të kishte kuptim nëse mbahet ky takim në Vjenë me vet shkaktarët e krizës VMRO-BDI. Situata e krijuar po merr më shumë përmasa serioze dhe duhet që faktori ndërkombëtar ta ketë parasysh edhe masën e sanksisoneve për ata të cilët nuk i respektojnë marrëveshjet, në këtë rast duhet që në mënyrë shumë eksplicite dhe direkte ti thuhet ish kryeministrit Gruevski se kështu nuk e ka vendin të merr pjesë as në takime dhe as në zgjedhje pas gjithë atyre obstruksioneve dhe sulmeve që i bën ndaj prokurorisë speciale në forma të ndryshme, duke mos e kursyer as piunin e tij presidentin e shtetit që të sjell një vendim për falje të krimeve që vet ata i kanë bërë”, deklaroi Ismet Ramadani për portalin tesheshi.com.
Cila është rrugëdalja nga kjo krizë politike sipas Ramadanit?
“Tani është minuar rëndësia e Marrëveshjes së Përzhinos, tani sipas meje duhet të zhvillohet një nivel tetër i bisedimeve duke krijuar një format të ri të të një qeverisje ekspertësh të cilët për një kohë pak më të gjatë të përgatitin terrenin dhe ambientin politik për shumë çështje të cilat janë në raportin e Pribesë, por edhe të Marrëveshjes së Ohrit, ku së bashku me Prokurorinë Speciale dhe një Gjykate Speciale të procesuohen dhe dënohen të gjithë të inkriminuarit politik. Ndryshe kjo është një shansë historike që pushteti në Maqedoni të dekriminalizohet dhe të fillojë një fazë e re e qeverisjes në Maqedoni që do jetë më e përgjegjshme dhe llogaridhënëse para qytetarëve të saj”, shtoi Ramadani.
Afrim Tanallari, gazetar: Anulimi i takimit, shqetësim për destabilizim qytetar
“Anulimi i takimit të Vjenës dëshmoi se partitë politike janë larg marrëveshjes dhe nuk kanë gadishmëri për të kontribuar në normalizimin e situatës e cila mund të prodhoje destabilizim qytetar që është rrezik për vendin. Kjo periudhë që do të pasojë, deri në takimin e rradhës që do ta thirrin ndërkombëtarët pasi do të jetë i domosdoshëm, do të shoqërohet me zënka. Duhet përmendur se situata kulminoi me vendimin e presidentit Gjorge Ivanov për falje, një tendencë për të minuar Prokurorinë Speciale. Fajin për këtë duhet ta bartin dy partitë maqedonase VMRO dhe LSDM, ndërsa pasojat do të jenë për gjithë qytetarët”, deklaroi Afrim Tanallari për portalin tesheshi.com. /tesheshi.com/
