Kryesuesja e Operacionit Ndërkombëtar të Monitorimit për reformën në drejtësi, ose ndryshe zonja spanjolle e vetingut, Genoveva Ruiz Calavera është shprehur optimiste për këtë proces, duke thënë se tashmë rezultatet e para janë dhënë. Ajo, duke folur për DË, iu referua dorëheqjes vullnetare të disa zyrtarëve nga instancat e drejtësië.
“Ligji për vettingun u dha një afat të qartë kohor gjithë anëtarëve të gjyqësorit që të paraqisnin një informacion paraprak mbi pasuritë dhe trashëgimitë e tyre. Para se afati të skadonte disa gjykatës, prokurorë dhe këshilltarë ligjorë zgjodhën të jepnin dorëheqjen. Në njëfarë mënyre, kjo do të thotë se vettingu tanimë ka filluar të sjellë rezultate, para fillimit të tij të pritshëm”, tha Calavera.
Dhe sipas saj, do jetë vjeshta koha kur vetingu nis i plotë si proces.
“Operacioni Ndërkombëtar i Monitorimit (ONM)) është gati të vërë në dispozicion ekspertizën e tij shumë të kualifikuar për të shoqëruar procesin, menjëherë sapo institucionet lokale të vettingut të jenë gati për të filluar procesin e rivlerësimit, që shpresojmë të nisë aty nga fillim i kësaj vjeshte”, tha zyrtarja spanjolle.
Sipas saj, vetingu është ndër proceset më të ndërlikuara të reformës në drejtësi, e që padyshim përcakton suksesin e kësaj reforme me pastrimin e strukturave të saj nga zyrtarët e padenjë. /tesheshi.com/
