Simone Zaza, një zëvendësues tek Juventusi që të kujton Fabricio Ravanelin e mesit të viteve ’90, i ka dhënë ekipit të tij një fitore të madhe mbrëmë, ndërsa ka shënuar në momentin e duhur.
Një ndeshje e luftuar fort, shumë taktike, por jo tepër tërheqëse, përballja e Juventusit me Napolin në Torino është mbyllur me fitoren 1-0 të vendasve, që kanë marrë për herë të parë kryesimin në klasifikim gjatë këtij kampionati.
Juventusi gjendej 11 pikë pas udhëheqësve të kampionatit në tetorin e vitit të kaluar, e sot është në vend të parë, pas një serie rekord rezultatesh pozitive. Vetëm të kujtojmë faktin se goli i fundit që ka pësuar Juventusi i përket 10 janarit, kur fitonte 1-2 në Xhenova ndaj Sampdorias.
15 gola ka pësuar Juventusi në 25 takime, ndërkohë që ka gjashtë ndeshje që porta e tij nuk preket. Prandaj dhe mbrëmë lojtari i ndeshjes u përcaktua të jetë Bufoni, portieri 38-vjeçar i “Zonjës së Vjetër”.
Napoli, në anën tjetër, me dështimin e mbrëmshëm i dha fund serisë prej tetë fitoresh, ndërkohë që nuk fiton në fushën e Juventusit që nga viti 2009. Me humbjen e së shtunës, Napoli lëshoi dhe vendin e parë në renditje. Kampionati ka ende kohë për të përfunduar, por lotët e argjentinasit Higuain në fundin e ndeshjes tregojnë për goditjen psikologjike që kanë pësuar napolitanët.
Ndeshja e mbrëmshme do të ishin deri diku e barabartë, me miqtë që në momente të caktuara të lojës u
treguan më kërkues. Bufon bëri dy pritje shpëtimtare, dhe meritoi duartrokitjet e publikut. Kur mendohej se gjithçka po shkonte drejt barazimit, torinezët e gjetën golin nëpërmjet Zazës, i futur në lojë në minutën e 58-të në vend të spanjollit Alvaro Morata. Një goditje e tij nga jashtë zonës, që fati e desh ta ndryshonte paksa drejtimin teksa preku një lojtar napolitan, përfundoi në rrjetën e miqve, që nuk u besuan syve.
Minuta e 88-të qe fatale për Napolin, që nuk arriti të bënte asgjë më pas. Napoli nuk e meritonte të humbiste, por, po ashtu, duhej të kishte luajtur më me guxim për të fituar.
Tani melodinë e kampionatit italian do ta luajë Juventusi, që është aty ku rëndom gjendet “Zonja e Vjetër”: në vend të parë. /tesheshi.com/
