Sekretari i Përgjithshëm i Organizatës së Bashkëpunimit Islamik ka premtuar angazhim të plotë për anëtarësimin e Kosovës në UNESCO.
Këtë e konfirmoi zëvendësministri i Jashtëm i Kosovës, Petrit Selimi, i cili është duke qëndruar në një vizitë njëditore në selinë e Organizatës së Bashkëpunimit Islamik në Jeddah të Arabisë Saudite.
I shoqëruar nga ambasadori i Kosovës në Arabinë Saudite, Rexhep Boja, z. Selimi ka pasur takim pune me Sekretarin e Përgjithshëm të Organizatës së Bashkëpunimit Islamik, shkëlqesinë e tij Iyad Ameen Madani, si dhe me ekipin e ekspertëve të OBI-së.
Selimi e ka njoftuar shkëlqesinë e tij Madani për ecurinë e lobimit për anëtarësimin e Kosovës në UNESCO dhe për hapat që kanë mbetur deri në mbledhjen e radhës së Komitetit Ekzekutiv dhe konferencës së UNESCO-s, ku pritet të votohet për Kosovën.
Dyzetë e katër shtete kanë bashkë-sponsoruar kërkesën e Kosovës për t’u futur në agjendën e Komitetit Ekzekutiv, përfshirë edhe shumë anëtarë të OBI-t.
Madani dhe Selimi janë pajtuar që në ditët e ardhshme MPJ dhe OBI të punojnë se bashku në informimin e saktë të anëtarëve të OBI-it dhe UNESCO-s për situatën në Kosovë dhe për nevojën e Kosovës që të integrohet në rrjedhat globale të arsimit, shkencës, kulturës dhe trashëgimisë./tesheshi.com/
