Numri dy i qeverisë së Kosovës, Branimir Stojanoviç, ka deklaruar së fundi se jo të gjithë bashkëkombasit e tij “duhen futur me një thes” sa i takon asaj se çfarë ka ndodhur vite më parë në Kosovë.
|Nuk janë të gjithë serbët kriminelë, ndërsa ata që kanë kryer krime kanë emër e mbiemër”, tha z/kryeministri Stojanoviç, deklaratë e cila erdhi si reagim pasi në fshatin Mushtisht u vendos një billbord me fotografi të shqiptarëve të vrarë në luftë dhe shkatërrimet që lanë pas forcat serbe.
Kjo në kuadër të kundërshtimit të kthimit të serbëve të ikur pas lufte. Por sipas qeveritarit serb, shumica e banorëve të Mushtishtit janë për kthimin e fqinjëve të tyre; e se janë kundër kthimit vetëm disa banorë, që sipas tij kanë ndërtuar shtëpi në tokat e serbëve dhe që shfrytëzojnë arat e tyre.
Në qëndrimin e tij, Stojanoviç kërkoi nga klasa politike e Kosovës që të deklarohen haptazi se kush është për kthimin e bashkëkombësve të tij në Kosovë e kush është kundër. /tesheshi.com/
