Mosmbushja e premtimit nga kryeministri Ramush Haradinaj se brenda dy javësh kërkesat e zjarrfikësve do të diskutohen në mbledhjen e qeverisë dhe do të ofrohet zgjidhje për këtë sektor, ka nervozuar Sindikatën e Zjarrfikësve.
Ata thonë se nuk kanë marrë asnjë përgjigje nga qeveria, ndërsa paralajmërojnë rikthimin e protestave nëse brenda një kohe nuk plotësohen kërkesat e tyre.
“Edhe pas premtimeve nga institucionet, pas protestës, kërkesave te parashtruara, pritjes dy javore, pritje me shpresa se qeveria do të marr vendim konkret dhe do të ndahet buxhet që së paku shkeljet dhe diskriminimet të ndërpriten, të gjitha dolën zhgënjyese, zjarrfikësit edhe një hëre u anashkaluan u injoruan padrejtësisht, mbeten me te njejtat probleme, pa paisje personale, me koficient më të ulet në nivel vendi, me paga me të ulëta në raport me Shërbime emergjente, me rrezikshmërinë më të ultë ne punë, pa kompenzime për punë të ndërrimeve të natës, festive shtetërore, pa dinjitet e shum problemeve tjera”, thuhet në reagim.
Zjarrëfikësit apelojmë te qeveria, tek Ministria e Financave, Ministria e Brendshme dhe Admistratës Publike që urgjentisht të shqyrtojnë këtë gjendje te krijuar dhe të ndryshojnë qasje.
“Ne do të jemi këmbëngulës në kërkesat tona dhe qëndrimet tona dhe në momentin që vërejmë se puna e komisionit prolongohet dhe nuk jep rezultate, ne do ta riaktivizojmë protestën, që asnjëherë nuk e kemi dëshiruar, prandaj mos na detyroni që për të drejtat tona legjitime të protestohet në rrugë, këtë trajtim Zjarrfikësit Shpëtimtar nuk e meritojnë”, thuhet në reagim. /tesheshi.com/
