Nga Blendi Gashi
Nuk ka të ndalur djegia dhe dëmtimi i veturave të zyrtarëve të shtetit në Kosovë. Të premten pas mesnate është djegur vetura e gruas së ministrit të Bujqësisë, Memli Krasniqi si dhe sot pasdite vetura e bashkëshortes së zv.ministrit të Administrimit dhe Pushtetit Lokal, Bajram Gecaj.
Përkundër se këto raste çdo ditë e më shumë po rriten, Policia e Kosovës vazhdon të jetë në ‘gjumë’ të thellë pasi ende nuk ka kapur asnjë prej autorëve që i kanë vënë flakën veturave qoftë atyre shtetërore së fundmi edhe këtyre private.
Për djegien e veturës së ministrit Krasniqi ka reaguar edhe Qeveria e Kosovës por dhe bashkëpartiakët e tij nga Partia Demokratike e Kosovës, të cilat këto akte i kanë quajtur politike.
Përfaqësuesit e mazhorancës drejtojnë gishtin tek partitë opozitare për djegien e veturave, një gjë të tillë e mohojnë këta të fundit.
Derisa, ekspertët e sigurisë aktet e tilla i quajnë kriminale dhe bëjnë thirrje që sa më parë autorët të vihen para drejtësisë.
Gecaj: Familja ime s’ka probleme personale me askënd
Zv.ministri, Bajram Gecaj, ka thënë për mediat se ai dhe as gruaja e tij nuk kanë kurrfarë problemi personal me askënd, mirëpo ka shtuar se këto veprime mund të jenë të Vetëvendosje-s.
“Unë as gruaja ime me askënd nuk kemi probleme personale. Janë sipas të gjitha gjasave veprime terroriste të brigadave të kuqe të Lëvizjes Anarkiste të Vetëvendojses”, ka thënë Gecaj.
Ndërsa, ministri, Memli Krasniqi, përveç se ka pranuar se vetura e djegur është e tij, ai nuk ka dhënë detaje të tjera pasi ka pohuar se policia duhet ta thotë fjalën e saj.
Gani Koci bën fajtor liderët e opozitës
Anëtari i kryesisë së PDK-së, Gani Koci, ka goditur direkt liderët e partive opozitare për djegien e veturës së Krasniqit.
“Piromanët janë në aksion! Këta tashme kanë adresë. Adresa e tyre është Albin Kurti, Visar Ymeri, Ramush Haradinaj e Fatmir Limaj! Shteti duhet të veprojë me urgjencë!”, ka shkruar Koci në llogarinë e tij në Facebook.
Tahiri i VV-së: Qeverinë po e kundërshtojmë në shesh, jo me akte të tilla
Partitë opozitare në mënyrë kategorike mohojnë të kenë gisht në djegien e veturës private të ministrit Krasniqi.
Adonis Tahiri, nga Sekretariti për media i Lëvizjes ‘Vetëvendosje’, ka mohuar që opozita t’i ketë vënë flakën veturës në fjalë, derisa akuzat e bëra në drejtim të tyre nga pushteti i shpifje dhe me qëllim për të frikësur dhe heshtur pakënaqësinë e qytetarëve.
“Ne jemi në protestë në shesh ku i ftojmë të gjithë qytetarët që të na bashkohen. Kundërshtimi i kësaj qeveri bëhet në shesh e jo me akte të tilla. Insinuatat e pushtetit dhe shpifjet e tyre janë vazhdimësi e politikës së tyre policore për ta frikësuar dhe heshtur pakënaqësinë e qytetarëve e cila po rritet. Me të vërtetë këto shpifje dhe akuza tregojnë për frikën që regjimi e ka nga qytetarët e organizuar në shesh”, ka thënë Tahiri për tesheshi.com.
Deputetja e NISMA për Kosovën, Valdete Bajrami, ka theksuar se nuk e përkrahin dhunën dhe kush do që i ka bërë ato veprime, duhet të dalin para drejtësisë.
Ekspertët e sigurisë: Organet e rendit të bëjnë punën e tyre
Ndërsa, njohësi i sigurisë, Burim Ramadani, njëherit ish deputet djegien e veturës së Krasniqit e quan veprim të papranueshëm dhe kriminal.
“Kjo nuk i duhet askujt në Kosovë dhe dëshmon edhe njëherë për sfidat e vazhdueshme të sigurisë publike. Organet përgjegjëse duhet ta bëjnë punën e tyre me profesionalitet dhe pa trysni, të zbardhin motivet dhe të sjellin para drejtësisë autorin apo autorët. Po ashtu, pavarësisht ndjenjës irrituese që shkaktojnë këto akte të ulëta, besoj se është e rëndësishme përmbajtja nga cilësimet e ndryshme pas këtij akti kriminal derisa organet e rendit dhe drejtësisë të kryejnë punën e tyre”, ka thënë Ramadani për tesheshi.com.
Reagojnë edhe amabasadori amerikan dhe KMDLNJ
Edhe, Këshilli për Mbrojtjen e të Drejtave dhe Lirive të Njeriut (KMDLNJ), poashtu ka dënuar ashpër sulmet dhe shkatërrimet e pronës publike dhe private dhe kërkon nga organet e hetuesisë që të ndërmarrin veprime të menjëhershme për parandalimin e këtyre sulmeve dhe kapjen e sulmuesve duke i sjellur para organeve të drejtësisë dhe duke i dënuar sipas ligjeve në fuqi.
“Në të kundërtën, këto sulme vetëm se do të vazhdojnë dhe pasojat do të jenë të paparashikueshme ndërsa përgjegjësia do të jetë e të gjithë atyre që kanë kontribuar në tensionimin e situatës, thellimit të krizës, mosveprimit në zbatim të ligjit apo arsyetimit të veprimeve me porosi të dhunshme! Duhet të veprohet derisa nuk është bërë vonë!”, thotë KMDLNJ.
Ndërsa, ambasadori amerikan Greig Delawie, në një postim në llogarinë e tij në rrjetin social në Tëiter, ka reguar për djegien e veturës së ministrit Krasniqi, me ç’rast ka kërkuar të hetohet ky rast.
“I shqetësuar për djegien e veturës së Memli Krasniqit. Të gjitha krimet duhet hetuar dhe të ndiqen penalisht”, ka deklaruar ai.
Ndryshe, që nga fillimi i krizës politike të nisur në shtator të vitit të kaluar kanë ndodhur disa raste të djegieve të veturae zyrtare por që autorët nuk janë kapur nga policia. /tesheshi.com/
