Deputeti i PD në Qarkun e Gjirokastrës, Tritan Shehu, përmes një komenti në rrjetet sociale shkruan se qeveria në vend që të shpenzojë miliona në konçensione korruptive dhe shterpë duhet të përgatisë infrastrukturën për të përballuar fatkeqësitë si kjo e zjarreve apo edhe më të rënda.
Duke komentuar situatën e krijuar në të paktën dy muajt e fundit si rezultat i zjarreve në të gjithë vendin, Shehu shprehet se vështirësia për të përballuar situata të tilla tregon se kapacitetet teknike dhe logjistike të Shqipërisë janë shumë larg nevojave dhe kërkesave për të përballuar katastrofa të tilla.
Gjithashtu ai i drejton një apel organeve ligjzbatuese që të hetojnë çdo rast dhe të çojnë para drejtësisë cilindo që është i përfshirë në zjarrëvëniet.
Deputeti demokrat vlerëson si mjaft të rëndësishme ndihmën e dhënë nga Greqia, e cila ofroi dy avionë të vegjël në operacionet për shuarjen e zjarreve, ndërsa vlerëson edhe të gjithë personelin e angazhuar.
“Gadishmëria njerëzore dhe puna e lavdërueshme e personelit zjarrfikës të Qarkut, ushtarakëve, së bashku me strukturat e tjera aty, pavarësisht mungesave thelbesore.
Ndihma e dhënë nga organet lokale si dhe nga vetë qytetarët, përfshi edhe ata të ardhur këto ditë për të kaluar pushimet.
Ndihma e mbështetja e çmuar e arritur nga strukturat përkatëse të Greqise, tokësore edhe ajrore këto, që luajtën një rol të rëndësishëm në dominimin e situatës, qoftë nëpërmjet mjeteve, eksperiencës apo mobilizimit njerëzor të tyre të treguar”, janë 3 momentet që vlerëson Tritan Shehu nga operacionet e ndërmarra në qarkun e Gjirokastrës. /tesheshi.com/
