Zjarret e pakontrollueshme në juglindje të Francës kanë detyruar 10 mijë persona të lënë shtëpitë e tyre në operacione evakuiimi që kanë zgjatur gjatë gjithë natës. Me qindra zjarrfikës janë vendosur në zonë për të luftuar me zjarret në afërsi të Bormes-les-Mimoses, në rajonin e Provence-Alpes-Côte d’Azur.
Më herët, Franca kërkoi ndihmë nga vendet fqinje të Bashkimit Europian për të shuar zjarret. Rreth 4 mijë hektarë tokë janë djegur përgjatë bregut të Mesdheut, në pjesën e brendshme malore dhe në ishullin e Korsikës.
Zyrtarët thonë se zjarret kanë rënë në një zonë që e dyfishon apo e trefishon popullsinë gjatë verës. Një nga vatrat më të vështira ndodhet pranë resortit popullor të Saint-Tropez.
Në Korsikë, me qindra shtëpi janë boshatisur. Në betejën me zjarrin, janë lënduar të paktën 12 zjarrfikës dhe 15 policë. /tesheshi.com/
