Kryeministri Edi Rama ka reaguar për herë të parë në lidhje me situatën e zjarreve në vend, ndërsa ka premtuar se në 4 vitet e ardhshme investimet për ndërhyrjet në këto raste do të rriten. Rama shprehet përmes një komenti në rrjetet sociale se temperaturat ekstreme kanë ndikuar rëndshëm në një situatë të papreçedentë zjarresh në mbarë Mesdheun, ndërsa pranon se kapacitetet e Shqipërisë mbeten të ulëta përballë këtij kërcënimi kaq serioz.
Komenti i Kryeministrit Edi Rama
Vijojnë aksionet për vënien nën kontroll dhe shuarjen e vatrave të zjarreve në këto ditë temperaturash ekstreme, të cilat kanë ndikuar rëndshëm në një situatë të paprecedentë zjarresh në mbarë Mesdheun. Për përballmini e situatës janë angazhuar deri më sot 8261 vajza e djem nga Emergjencat Civile, Forcat Zjarrfikëse, Forcat e Armatosura, stafet e bashkive si edhe vullnetarë, të mbështetur me 973 mjete tokësore dhe 5 mjete ajrore (2 helikopterë dhe 3 avionë). Situata mbetet e vështirë edhe për ditët në vijim që vala e të nxehtit të jashtëzakonshëm do të jetë prezente në territorin tonë.
S’ka dyshim se kapacitetet tona mbeten të ulëta përballë këtij kërcënimi kaq serioz dhe në katër vitet e ardhshme do të përpiqemi seriozisht për rritjen e këtyre kapaciteteve. Sidoqoftë, faktet flasin vetë qoftë për punën kolosale që është bërë në kushte tejet sfiduese, qoftë për kujet e krismat digjitale të atyre që duhet të japin llogari e jo të kërkojnë llogari. Nga 280 vatrat e zjarrit në të cilat ka qenë e nevojshme ndërhyrja e strukturave shtetërore, sot janë aktive vetëm 8 prej tyre dhe ky numër pritet të ulet në orët në vijim falë gatishmërisë maksimale, koordinimit të plotë dhe bashkëpunimit të lartë mes institucioneve vendore e qendrore. /tesheshi.com/
