Një shqiptare, 28 vjeç, raportohet se ka humbur jetën si pasojë e një zjarri që ka përfshirë një qendër emigrantësh në Clemensheim të Bad Driburg-ut (Gjermani). Zjarri ka shpërthyer pasditen e të premtes, rreth orës 16: 30, në katin e dytë të ndërtesës.
Sipas tag24.de, përveç shqiptares flakët kanë lënduar edhe një prej punonjësve të sigurimit të qendrës, i cili tentoi të shpëtonte azilkërkërkuesit.
Shqiptarja mësohet se ishte invalide dhe është gjetur e pajetë në shtratin e saj.
Sipas mediave gjermane, në këtë qendër janë vendosur kryesisht invalid ose emigrantë në nevojë, që kanë aplikuar për azil.
Mbi 100 persona të ekipeve shpëtimtare janë mobilizuar me këtë rast. Kur ata kanë arritur në vendin e ngjarjes, retë e tymit shiheshin tashmë nga larg. Ndërtesa është evakuuar, ndërsa banorët janë vendosur në sallën e sporteve.
Ende nuk dihet shkaktari i zjarrit ndërsa hetimet po zhvillohen në atë drejtim. /tesheshi.com/
