Ndërsa Beogradi e ka cilësuar si “akt terrorist” vrasjen e Oliver Ivanoviçit, Moska ka shkuar edhe më tej, duke e cilësuar ish-njeriun më të fortë të Mitrovicës veriore, si “dëshmor në mbrojtjen e popullit serb në Kosovë”.
Rusia jo pa qëllim ka lëshuar sot sy deklarata zyrtare, një prej ambasadës serbe në Beograd dhe një tjetër nga Ministria e Jashtme ruse.
Selia diplomatike e Moskës në Beograd, në një gjuhë të ashpër e ka cilësuar vrasjen e Ivanoviçit si “një shenjë e vazhduar e paligjshmërisë dhe dhunës në Kosovë që kur NATO e pushtoi këtë pjesë të Serbisë, duke e ndarë nga territori sovran kujt i takonte.
Ivanoviç ishte një njeri i cili pas agresionit të NATO-s kundër Serbisë dhe ndarjes së detyruar të Kosovës dhe Metohisë, i kushtoi jetën e tij mbrojtjes së të drejtave të popullit serb në krahinë dhe për këtë arsye u ekspozua ndaj persekutimit”.
Por ambasada ruse shkon edhe më tej, kur drejton gishtin ndaj shqiptarëve: “Kjo është një tjetër përpjekje për të frikësuar popullatën serbe, dëmtuar perspektivën e një zgjidhjeje paqësore, të përbashkët e të pranueshme.
Ajo që ndodhi sot është një tregues i paligjshmërisë dhe dhunës që ka dominuar Kosovën.
Ne shpresojmë se krimi do të hetohet nga strukturat ndërkombëtare në Kosovë dhe në të duhet ta marrin pjesë autoritetet kompetente të Serbisë”, përfundon deklarata e ambasadës.
Pak më vonë reagoi Ministria e Jashtme ruse, e cila thekson se “bërja e llogarive duke përdorur terrorin si mjet për të rritur tensionet ndëretnike është shumë e gabuar dhe do të trazojë rajonin”. /tesheshi.com/
