Një prej yjeve të futbollit botëror të fundit të viteve ’70 dhe të fillimit të viteve ’80 të shekullit të shkuar, e futbollisti brazilian më i mirë i atyre kohëve, Ziko ka dhënë këto ditë një intervistë për kanalin televiziv të Barcelonës, Barça TV.
Ish-lojtari i Flamengos dhe i Udinezes, është pyetur për një bashkëkombas të tij, Nejmarin, që luan për Barcelonën. “Nuk do të qe surprizë e madhe nëse Nejmar do të shpallej lojtari më i mirë në botë,” ka qenë përgjigjja e Zikos.
“Ai është tani një prej më të mirëve, e është gati për të qenë më i miri,” ka vijuar ai.
“Fantastike” e ka cilësuar Ziko dhe mënyrën se si treshja Mesi, Nejmar e Suarez luan për ekipin. I ndalur te argjentinasi Mesi në veçanti, ai do ta çmonte lart atë: “Pele, Garrinça, Krujfi, Bekenbaueri dhe Maradona janë lojtarët më të mirë që kam parë të luajnë. Mesi po arrin në nivelin e tyre.”
Ndërsa në lidhje me Champions League-n, Ziko i sheh Barcelonën dhe Bajernin e Mynihut si dy ekipet favorite për ta fituar atë. Por i kujton Barcelonës se nuk duhet ta nënvlerësojë Arsenalin: “Barça ka çdo mundësi për të fituar në Londër dhe në takimin e dytë, por Arsenali është një ekip i madh gjithashtu, e gjendet në formë të mirë.” /tesheshi.com/
