Nga Mensur Krasniqi
Gjatë rikonsolidimit të degëve, kryetari i LR-PDSH-së, Zijadin Sela ka realizuar një tubim edhe me qytetarët e Kërçovës.
Pavarësisht faktit që ky rajon njihet si bastion i Bashkimit Demokratik për Integrim, në këtë tubim ka pasur një numër tejet të madh të mbështetëseve të Selës.
Gjatë këtij takimi, Sela tha se është shumë i nderuar me praninë aq masive të mbështetësve të Lëvizjes dhe të Aleancës për Shqiptarët.
“Jemi të gatshëm ta shkrijmë tërë karrierën tonë politike për të mirën e shqiptarëve. Unë dhe Vesel Memedi do të jemi shërbëtorët e parë të anëtarëve të Aleancës dhe gjithë shqiptarëve”, tha Sela.
Nga ana tjetër, kryetari i sapozgjedhur i degës së Kërçovës, Remzi Memedi tha se është një privilegj por edhe përgjegjësi të udhëhiqet me këtë degë. “Të jesh i pari nuk do të thotë që me çdo kusht je më i miri, por kjo do të thotë që ka edhe më të mirë, dhe ky është një privilegj të udhëheqësh me ta”, tha Memedi.
Ndryshe, në rrjetet zyrtare të LR-PDSH është shënuar që kjo është hera e parë që po thyhet bastioni i BDI-së në Kërçovë.
“Kam një porosi shumë të rëndësishme që dua të theksoj: Ka ardhur koha që të thuhet me zë të lartë që Kërçova nuk është e Ali Ahmetit, por është e kërçovarëve”, shkruan në facebook, sekretari i LR-PDSH, Arben Taravari. /tesheshi.com/
