Kryetari i LR-PDSH-së, Zijadin Sela në një intervistë për Klan Kosova ka theksuar se legjimiteti që po pretendon partia shqiptare BDI me pushtetin e saj, më në fund u dogj me djegien e shtëpive në “Lagjen e Trimave” në Kumanovë.
“Në ‘Lagjen e Trimave’ kishte terror dhe terrorizëm dhe kjo u ushtrua nga forcat policore, duke pasur parasysh se nuk pati paralajmërim. Ideja ishte që të shkohet dhe të vriten shqiptarët, bile u vranë edhe njerëz që për shqiptarët kanë qenë krenari”, theksoi Sela në intervistën për Klan Kosova.
Sipas tij, politika maqedonase krizat shtetërore i zgjidh përmes skenareve të montuara kundër shqiptarëve.
“Sa herë që kasta politike maqedonase do t’i bëj bisht ndonjë afere apo krize, zgjidhja nga jo krizë gjindet përmes montimit të proceseve të radhës. Kjo ishte me ‘Lagjen e Trimave’, ashtu siç ishte rasti i aferës së armëve në vitet e 90-ta, apo rasti ‘Monstra’, ‘Sopoti’, etj”, shtoi Sela.
Në fund, Sela foli edhe për zgjedhjet e parakohshme parlamentare, ku sipas tij, BDI-ja po shpejton që të shkojë në zgjedhje, duke lënë hapësirë që opozita të bojkotoj zgjedhjet dhe kjo parti më pas të manipulojë së bashku me VMRO-në.
Ndryshe siç thotë Sela, BDI është në panik dhe ka frikë nga humbja e pushtetit.
Të rikujtojmë se për momentin asnjëra nga partitë si Lëvizja Besa, po edhe kjo e Selës nuk po lëshojnë pe dhe t’ia zgjasin njëra-tjetrës dorën e koalicionit parazgjedhor, ndryshe BDI mund të dobësohet nga shpërndarja e votave shqiptare, por vështirë t’i humb zgjedhjet. /tesheshi.com/
