Ylli i futbollit botëror, aktualisht trajner i Realit të Madridit, Zinedin Zidane po lobon që Kosova të bëhet sa më shpejt anëtare e UEFA-s.
Futbollisti me origjinë nga Algjeria, në një bisedë për gazetarin Nefail Maliqi, theksoi se “tashmë kemi bërë disa takime të rëndësishme dhe shpresoj se në kongresin e ardhshëm të kemi një lajm pozitiv për anëtarësimin e Kosovës. Duhet pasur durim”.
“Zizu”-ja është një ambasador i OKB-së në fushatën kundër varfërisë dhe ai ka dhuruar 1 milionë franga zvicerane për Shqipërinë.
“U bënë vite tashmë që Kosova është e çliruar dhe shqiptarët duhet të kenë mundësi që të kenë sportin e tyre sipas të gjitha standardeve ndërkombëtare”, tha trajneri i “galaktikëve” të Realit, i cili thekson se do të vazhdojë të ndihmojë për anëtarsimin e Kosovës në UEFA por edhe në FIFA.
Ai ka rikujtuar situatën e popullit të Kosovës para luftës: “më kujtohen si sot skenat dhe tmerri në Kosovë gjatë luftës të cilën e jepnin kanalet televizive botërore”, theksoi ai për Presheva Jonë.
Duke folur për futbollin, Zidane pohon se “për ta ndihmuar Shqipërinë, sigurisht ishte një vendim i përbashkët me miqtë, bashkëpunëtorët dhe me ekipin tim në kuadër të projektit në fushatën kundër varfërisë në botë.
Këtë fushatë e përgatëm së bashku me kolegun tim brazilian Ronaldo, i cili atë kohë ishte i angazhuar për Kosovën, ndërsa unë për Shqipërinë. Ishte një projekt tejet serioz për ta ndihmuar një shkollë”, përfundon Zizu. /tesheshi.com/
