Ndërsa ka lënë pas fitoren e bujshme ndaj Barcelonës në fundjavë, Reali i Madridit luan sot ndaj Volfsburgut në Gjermani në kuadër të çerekfinaleve të Champions League-s.
Ekipi gjerman po kalon një moment të keq në Bundesligë, ku ka tre ndeshje pa fituar, duke rrëshqitur në vend të tetë në renditje.
E pikërisht për këtë arsye, Zinedine Zidane, trajneri i Realit, i druhet një mungese përqendrimi të lojtarëve të tij në këtë takim. Duke dashur ta mbajë skuadrën në tension për ndeshjen e kësaj mbrëmjeje, Zidane e quan përballjen ndaj Volfsburgut si një finale.
“Do t’i qasemi (ndeshjes) si një finale. Nuk mund të shtendosemi: fitorja ndaj Barcelonës është harruar tashmë,” ka deklaruar francezi.
“Volfsburgu ka luftuar fort për të qenë këtu, dhe e meriton të jetë këtu. Ata mund të kenë patur probleme në Bundesligë, por ky është një aktivitet tërësisht i ndryshëm.”
Ai u kujton lojtarëve të tij se mund ta pësojnë nëse e marrin lehtë takimin. “Ne nuk jemi të paprekshëm, dhe Volfsburgu mund të na dëmtojë. Ata kanë një sulm të shpejtë, prandaj duhet të jemi shumë të vëmendshëm.”
Pritet që Reali të paraqitet në fushë me të njëjtën përbërje që mundi Barcelonën. Ky është viti i gjashtë rresht që Reali i Madridit luan në çerekfinalet e Champions League-s, kurse kundërshtari, Volfsburgu, ka arritur për herë të parë në këtë fazë të veprimtarisë.
Ndeshja tjetër çerekfinale e mbrëmjes vë përballë PSG-në me Mançester Sitin. /tesheshi.com/
