Carlos Dunga, trajneri i kombëtares braziliane, nuk ka parapëlqyer ta thërrasë mbrojtësin e Realit të Madridit, Marcelo-n, për dy ndeshjet kualifikuese për botërorin e 2018-ës, ndaj Uruguajit dhe Paraguajit.
Dunga e ka shpjeguar lënien jashtë përfaqësueses së Marcelo-s me dëmtimet që ai ka patur së fundi. Sipas Dunga-s, mjeku i kombëtares së Brazilit ka biseduar me atë të Realit të Madridit, e që këtej është marrë vendimi.
“Mjeku i ekipit të Brazilit bisedoi me atë të Realit të Madridit, dhe ne vendosëm ta lëmë pushim Marcelo-n, ndërsa ai ka patur shumë dëmtime së fundi.”
Por ashpër ka reaguar Zinedine Zidane, që e ka quajtur gënjeshtër shpjegimin e Dunga-s. Francezi po ashtu e mohoi faktin se përfaqësues të federatës braziliane kanë biseduar me ekpin mjekësor të Realit mbi gjendjen fizike të Marcelo-s.
“Askush nuk ka folur me dikë këtu për Marcelo-n. Eshtë një gënjeshtër,” ka deklaruar troç Zidane.
“Marcelo është në gjendje fizike shumë të mirë, aq sa për të luajtur për Realin e Madridit, e për të luajtur për vendin e tij,” ka shtuar trajneri i madrilenëve. /tesheshi.com/
