Ndeshjet në transfertë janë bërë makthi për Realin e Madridit, që nuk ia del të rigjejë rrugën e fitores në këto sfida. Dy pikë të tjera të lëna në Sevilje mund t’i kushtojnë skuadrës së drejtuar nga Zinedine Zidane në luftën për titullin kampion.
Ishte skuadra e Real Betisit ajo që i ndaloi hovin Realit të Madridit, me një barazim të merituar 1-1 në fushën e vet.
Vendasit kaluan në epërsi që në minutën e 7-të, duke i befasuar madrilenët. Këta të fundit e morën veten në minutat pasardhëse, duke nisur ta zotërojnë lojën. Pjesa e dytë qe e tëra për miqtë nga kryeqyteti, që lojën tërësisht në sulm e konkretizuan vetëm me një gol të francezit Benzema.
Këto janë dy pikët e para të humbura nga Reali që prej uljes në stol si trajner të të mirënjohurit Zinedine Zidane.
Kështu, mbretërit mbeten katër pikë prapa Barcelonës që udhëheq kampionatin, që, për më tepër, ka edhe një ndeshje më pak të zhvilluar. /tesheshi.com/
