Ziadin Sela, politikani shqiptar që u rrah brutalisht mbrëmjen e 27 prillit në Kuvendin maqedonas, do dalë në publik të hënën e ardhshme, ku do flasë në një konferencë për shtyp mbi gjithë atë çfarë i ndodhi. Kjo është bërë e ditur nga burime brenda partisë së tij, që thonë gjithashtu se ai është mirë me shëndet dhe se po përmisohet dita-ditës.
Në këtë dalje të pritshme, Sela pritet të rrëfejë ndoshta mbi detaje të tjera të asaj mbrëmjeje të përgjakshme, ku ai ishte aq pranë vdekjes, i sulmuar nga turmat e irrituara të maqedonasve, përkrahës të VMRO-së.
Tjetri që u godit e po ashtu u përgjak atë mbrëmje, ishte kreu i LSDM-së, Zoran Zaev. Por Sela përfundoi në gjendje më kritike. Ditë më parë ai doli nga spitali, por u mjaftua të thotë pak fjalë para përkrahësve në Strugë, atje ku dhe banon.
Ziadin Sela është një politikan i dalë nga PDSH-ja e Menduh Thaçit, duke themeluar një Lëvizje Reformuese të kësaj partie, nën ankronimin LR-PDSH. Së fundi ai është vënë në krye të koalicionit Aleanca për Shqiptarët, që pritet të jetë dhe pjesë e qeverisë së Zaevit. /tesheshi.com/
