Ndonëse Aleanca për Shqiptarët para disa ditësh kishte paralajmëruar se do të dalë me kandidatë të saj për kryetar komune në Kërçovë, tani lideri Ziadin Sela ka ndryshuar mendje.
Ai, në një intervistë dhënë për Medial.mk, ka pohuar se subjekti që i takon, “nuk do të nxjerrin kandidat në komunën e Kërçovës në zgjedhjet lokale të 15 tetorit”.
Sela ka thënë se do të ishte shumë me rëndësi që partitë shqiptare për komunën e Kërçovës, por edhe komunat tjera të dalin me qëndrime të përbashkëta dhe të unifikuara, me qëllim që sërish të fitohet Kërçova.
Sela thotë se me shumë mund është fituar Struga dhe Kërçova, dhe të njëjtat duhet të mbrohen. Ai është shprehur se deri më sot kandidat për komunën e Kërçovës nuk ka pasur, dhe pasi që atë e publikoi e para BDI, është e rrugës që ai propozim të përkrahet.
Sela kërkoi përkrahje për Fatmir Deharin, por bëri thirrje deri te votuesit që, nëse dëshirojnë ta përkrahin dhe ta ndihmojnë Aleancën për Shqiptarët, atëherë do të duhet ta votojnë edhe listën e këshilltarëve të saj. /tesheshi.com/
