Banka e Bashkuar e Shqipërisë (UBA Bank) në bashkëpunim me Bosnia Bank Internacional Business Club organizoi seminarin “Prezantimi mbi Sarajevo Business Forum SBF 2017”.
Ky seminar prezantimi mblodhi në ambientet e Hotel Tirana International një numër të konsiderueshëm kompanish shqiptare dhe nga rajoni ku u informuan rreth organizimit dhe përmbajtjes së Sarajevo Business Forum i cili organizohet çdo vit nga BBI Bank në Sarajevë.
Në prezantim fjalën hapjes e mbajti z. Muhamed Prlja, Drejtori i UBA Bank i cili shpjegoi rolin e UBA Bank si ndërlidhëse ndërmjet bizneseve dhe forumit që organizohet si dhe vuri në dukje rëndësinë e kooperimit në nivel rajonal. Ai foli rreth mundësive dhe potencialeve të mëdha që kanë vendet e rajonit në fusha të ndryshme si turizmi, agrikultura etj. Një treg rajonal rrit mendësinë e investimeve të huaja nga Europa, Lindja e Mesme dhe Kina. Prezantimin e SBF e bëri znj. Azra Çoliç, drejtoresha e VIP Business Club BBI Bank. Znj. Çoliç bëri një panoramë të SBF i cili do të zhvillohet në datat 22-23 maj 2017 në Sarajevë. Ajo vuri në dukje rëndësinë e kësaj konference për zhvillimin e biznesit në rajon e më gjerë. Çdo vit, konferenca mbledh më shumë se 1.000 pjesëmarrës dhe ka mbulim të plotë mediatik si në nivel lokal ashtu dhe ndërkombëtar duke u pasqyruar në Al Jazeera Network, TRT, Anadolu Agency, Reuters, etj. Gjatë shtatë viteve të kaluara, SBF ka pasur nderin të mirëpresë figura politike dhe të biznesit të njohura globalisht dhe me ndikim. Qëllimi i kësaj konference është lidhja ndërmjet investitorëve publikë dhe privatë nga e gjithë bota me biznesmenë dhe pronarë e projekte zhvillimi nga rajoni. Ajo paraqet një platformë për rrjetet e biznesit dhe eksplorimin e mundësive të investimeve në rajonin e Evropës Juglindore me objektivin e vetëm për të nxitur zhvillimin e saj ekonomik.
SBF është një mundësi unike në llojin e vet për të gjithë bizneset që duan të promovojnë veten dhe të zhvillohen në maksimumin e tyre.
Në fjalën përmbyllëse, z. Prlija, drejtori i UBA Bank, theksoi dhe njëherë rëndësinë e këtij forumi si një mundësi shumë e mirë për të gjitha bizneset në vendin tonë dhe në rajon. Ai ftoi bizneset shqiptare që të behën pjesë e SBF 2017 dhe të eksplorojnë mundësitë e biznesit që ofrohen në takimet intensive. Z. Prlja theksoi rolin e bankës UBA në forcimin e marrëdhënieve të bizneseve dhe në thithjen e investime të huaja direkte në Shqipëri. /tesheshi.com/
