Kreu demokrat Basha ka publikuar pamje nga zhvillimet e dhunshme te Bregu i Lumit, një tip “Astiri nr.2”, ku banorët u përplasën me policinë në përpjekje për të mos lënë fadromat të vijonin punën për zgjatjen e Bulevardit të Ri, me pretendimin se shtëpitë e tyre që po prishen nuk janë kompensuar.
Këtë zhvillim, Basha e ka përkthyer politikisht.
“Dhunë, gaz dhe terror nga policia kundër qytetarëve në shtëpitë e tyre! Kjo qeveri i ka tradhëtuar njerëzit e thjeshtë dhe Shqipëria është në mjerim ekonomik, me padrejtësi dhe pasiguri në çdo cep të saj.
Të gjithë ata që urdhëruan, dhunuan dhe sulmuan me gaz në shtëpitë e veta qytetarët dhe fëmijët e tyre në mënyrë kriminale, do të mbajnë përgjegjësi!
Ju bëj thirrje të gjithë shqiptarëve t’i dëgjojnë këto këmbana alarmi, të bashkohemi, t’i japim dorën njëri-tjetrit për t’i dhënë fund këtij regjimi, për të çliruar drejtësinë, e për të garantuar një qeveri që punon për popullin”, shkruan Basha, duke përcjellë dhe pamjet.
https://www.facebook.com/lulzimbasha.al/videos/531488220715292/?t=0
Nga ana tjetër, kryebashkiaku i Tiranës Erion Veliaj, tha se cështja e banorëe është e zgjidhur.
“Ne i kemi njoftuar që në dhjetor banorët për të liruar shtëpitë dhe për t’u strehuar në banesat sociale. Disa prej tyre kanë pranuar dhe kanë nisur procedurat, ndërsa të tjerë përdoren politikisht. Unë po e theksoj se sa të jem unë kryetar bashkie, nuk do të lejojmë astirizim të banorëve të Tiranës.
Unë e kam ndërgjegjen të qetë, pasi Bulevardi i ri do të bëhet dhe ndonëse këta banorë kanë zaptuar tokat atje, ne nuk po i nxjerrim në rrugë, por po u ofrojmë strehim në banesat sociale. Qytetarët kanë paguar njëherë për banesat sociale, ndaj nuk mund të paguajnë për së dyti, që këta të kompensohen me para kesh. Unë i siguroj banorët se oferta është prej kohësh, që të vijnë në banesat sociale, pasi është më mirë sesa te Bregu i Lumit”, tha Veliaj. /tesheshi.com/
