Ministria e Jashtme turke ka thirrur urgjentisht ambasadorin iranian dhe atë rus në Ankara, lidhur me një sulm të kryer nga forcat siriane në provincën Idlib, në veriperëndim të Sirisë, njoftuan burimet diplomatike.
Ankaraja zyrtare, e cila mbështet kryengritësit sirianë, po bashkëpunon me Teheranin dhe Moskën, të cilët mbështesin forcat e presidentit sirian Bashar al-Assad, në mënyrë që të gjejnë një zgjidhje për konfliktin sirian.
Turqia akuzoi të martën autoritetet siriane se kanë sulmuar forcat kryengritëse në kuadër të ofensivës kundër grupeve të armatosura, duke vlerësuar se një zhvillim i tillë mund të “sabotojë” procesin e përfundimit të konfliktit.
“Me pretekstin e luftës ndaj ish-ushtarëve të al-Nusra, forcat e regjimit qëlluan mbi rebelët e moderuar në Idlib”, tha shefi i kabinetit turk Mevlut Cavusoglu, të cilit i referohet agjencia turke e lajmeve, Anadolu.
“Një sjellje e tillë mund të sabotojë procesin e zgjidhjes politike”, shtoi ministri turk.
Burime pranë ministrisë së Jashtme njoftuan se Ankaraja për këtë arsye ka ftuar ambasadorin iranian dhe atë rus që t’ua përcjellë shqetësimin turk, dhe u kërkoi diplomatëve të lartë të ndikonin tek autoritetet siriane në mënyrë që të ndalonin sulmet.
Ofensiva e nisur në fund të dhjetorit të vitit të kaluar, vjen disa javë përpara takimit të caktuar në Soçi të Rusisë me 29 dhe 30 janar, ku duhet të marrin pjesë përfaqësues të autoriteteve siriane dhe opozitës.
Takimi do t’i kushtohet gjetjes së zgjidhjes për konfliktin në të cilin, që nga viti 2011, kanë humbur jetën 340,000 njerëz. /tesheshi.com/
