Ajo për të cilën kryetari i Bashkimit Demokratik për Integrim, Ali Ahmeti thirret në fushatat parazgjedhore si një ndër të arriturat më të mëdha gjatë qeverisjes së tyre, pra busti i heroit kombëtar, Gjergj Kastriot Skënderbeu, përfundimisht do të zhvendoset nga vendi ku gjendet tani.
Tani, komuna e Çairit ka hapur tender nëpërmjet të cilit do të bëhet zhvendosja dhe ngritja e bustit të heroit tonë kombëtar në postament të ri. Kjo zhvendosje sipas planit të komunës do të kushton 130 mijë euro, ndërsa do të zhvendoset jo më tepër se 2-3 metra nga pozita e deritanishme, poashtu në Çarshinë e vjetër. Zhvendosja e bustit është e domosdoshme meqë pozita e tanishme i pengon ndërtimit të fazës së tretë të “Sheshit Skenderbu” respektivisht vendosjes së pllakës së betonit mbi bulevardin “Goce Dellçev”.
Edhe pse projekti fillestar për ndërtimin e sheshit “Skenderbeu” parashihte një sipërfaqe në nivel të tokës që do të shtrihej që nga brendia e Çarshisë dhe deri tek Hamami “Daut Pasha” dhe objekti i Operës dhe Baletit, komuna e Çairit brenda natës dhe në mënyrë tinzore ndërroi këtë plan dhe vendosi të ndërtojë një tarracë të ngritur në shtylla betoni, me çka në fakt vuri një murë gjigant mes shqiptarëve dhe maqedonasve të Shkupit. /tesheshi.com/
