Pesë herë kampioni i botës, argjentinasi i famshëm Huan Manuel Fanxhio, u zhvarros këtë të premte në varrezat e qytetit të tij, Balkarke, në Argjentinë, për të gjetur përgjigje për pretendimet e Oskar Espinozës dhe Ruben Vazkezit, të cilët deklarojnë se ai ishte babai i tyre. Zhvarrimi u krye në praninë e zyrtarëve të Fondacionit Juan Manuel Fangio, dhe prej mbetjeve trupore të të ndjerit do të merret një mostër e ADN-së, si e vetmja rrugë për t’i dhënë zgjidhje çështjes së dyfishtë.
Fanxhio, i cili u shpall pesë herë kampion bote mes viteve 1951 dhe 1957, me katër ekipe të ndryshme, nuk u martua asnjëherë. Ai vdiq në korrikun e vitit 1995, në moshën 84-vjeçare, dhe nuk dihej të kishte fëmijë.
Vetë një pilot garash, Oskar Espinoza, i cili pilotoi për një kohë të shkurtër në Formula 3 dhe njihej përgjithësisht si “Kaço” Fanxhio mes njerëzve që kishin të bënin me garat, pretendon se e ëma kishte patur një lidhje me Fanxhion në vitet ’50, e thuhet që ai të ketë paraqitur si prova një tufë letrash që kampioni i pati shkruar asaj.
Pretenduesi tjetër, Ruben Vazkez, deklaron botërisht se është i biri biologjik i Fanxhios. Ai e bëri të qartë se kërkesa e tij nuk ka lidhje me interesa ekonomike, “Nuk ka kërkesa ekonomike në kërkesën time. Unë thjesht dua të njihem me mbiemrin Fanxhio.” 73-vjeçari Vazkez pretendon se nëna e tij, e cila vdiq në vitin 2012, në moshën 103 vjeç, kishte nënshkruar dokumente në prani të një noteri ku deklaronte se Fanxhio ishte babai i të birit të saj.
“Për arsye fati ne e pamë njëri-tjetrin vetëm një herë. Ai e dinte se unë isha djali i tij. Jam i sigurt për identitetin tim,” i tha Vazkez agjencisë kombëtare të lajmeve Justicia. “Unë nuk kam asnjë kontakt me familjen Fanxhio, dhe sigurisht dua t’i njoh ata.”
Huan Manuel Fanxhio vlerësohet si një prej pilotëve më të mëdhenj të Formula 1-shit të të gjitha kohëve. Ai i fitoi titujt kampionë duke pilotuar për ekipet Alfa Romeo, Ferrari, Mercedes-Benz dhe Maserati. Në 51 garat që ai zhvilloi, u nis 48 herë nga radha e parë, duke përfshirë 29 nisjet nga vendi i parë, përfundoi 35 herë në podium, dhe fitoi 24 gara. Të veçantë akoma e bën atë fakti se titullin e fundit si kampion e fitoi në vitin 1957, kur ishte 46 vjeç. /tesheshi.com/
