Braktisja e votimit të kryetarit të ri të Kuvendit nga grupi parlamentar i LSI-së, nxori zbuluar PD-në që legjitimoi me qëndrimin e saj në sallë zgjedhjen e Gramoz Ruçit në krye të Kuvendit. Të paktën 3 vota mendohet se i janë dhënë të urryerit si ish-ministër komunist ga grupi demokrat, por burime pranë kësaj partie i thanë tesheshi.com se ky numër mund të jetë më i madh, pasi nga vetë brenda socialistëve ka pasur vota kundër Ruçit.
Votimi i fshehtë e ka lënë çdo deputet me ndërgjegjen e tij kur ka shënuar kryqin në kutinë e vetme që të ftonte të votoje për kryetarin e ri të Kuvendit. Kjo bëri që nga 74 vota që pretendonte të merrte Ruçi nga grupi socialist, të cilin ai e ka drejtuar që nga viti 2009, të siguronte plotë 80 të tilla.
Nga 6 votat që rrodhën nga radhët e opozitës besohet se 3 janë të tre deputetëve të PDIU-së, parti e cila ka qenë në bashkëqeverisje me PS-në në 4 vitet e fundit, ndërsa 3 votat e tjera nga grupi i demokratëve. Rrjedhja e votave shkaktoi një furtunë të vërtetë në PD, që nga akuzat për manipulim nga ana e komisionit, e deri tek shpërthimi i Sali Berishës për “tradhëtarët” brenda partisë.
Dhe të mendosh se këto vota u dhanë ndërkohë që PD-ja krijoi një aksion politik kundër zgjedhjes së Ruçit dhe nxiti protestën e ish-të përndjekurve politikë kundër rikthimit të një “ish-komunisti”.
Por burime pranë partisë më të madhe në opozitë besojnë se ka pasur më shumë vota pro-Rucit nga kjo parti, duke besuar se nga brenda PS-së ka pasur vota kundër tij. Këto burime i thanë tesheshi.com se ka pasur një marrëveshje të heshtur Rama-Basha për qëndrimin e PD-së në sallë që do të shmangte ndonjë suprizë të pakëndshme në votim. Vetë Rama nuk ishte i bindur se të gjithë deputetët e tij do t’a votonin Ruçin.
Pakënaqësitë për rikthimin e kastës së vjetër që Rama bëri këtë mandat me Ruçin, Xhafajn dhe Majkon, dhe me vendosjen e Taulant Ballës si kryetar grupi, janë shfaqur në radhën e të rinjve që kryesocialisti mori me vete dhe i mbështeti në karrierë kur u bë kryetar i partisë.
Rishtarët e vitit 2005 që Rama solli nga Bashkia e Tiranës ose nga Mjaft, të mbështetur fillimisht si ministra, por të lënë pa asnjë post partiak dhe ekzekutiv këtë mandat, ishin vota të pasigurta ndaj Ruçit, një veteran i PS-së të cilin ata e gjetën në parti.
Duke pasur parasysh dhe sjelljen e moderuar të kryetarit të opozitës Lulzim Basha, i cili e uroi Ruçin për detyrën, dhe vendimin për të legjitimuar votimin me qëndrimin në sallë duke e ditur se votimi i fshehtë lë hapësira për rrjedhje votash gjithmonë, PD ua hapi vetë rrugën “votave pro” Ruçit simpatizantëve ose miqve të politikanit socialist në PD. /tesheshi.com/
