Dy misionet e rëndësishme ndërkombëtare të cilët realisht kanë hartuar Reformën në Drejtësi, por edhe ligjet organike për zbatimin e saj, janë ndjerë të “tradhëtuar” nga ana e PD-së dhe LSI-së, të cilët, të pasuar edhe nga disa emra të njohur në media kanë ngritur zërin se me reformën në fjalw do të preket liria e shprehjes.
Në Komisionin e Posaçëm të Reformës, mësohet se përfaqësuesit e EURALIUS kanë bërë të ditur se nuk duhet të diskutohet, madje është spekulim i pastër që me të ashtuquajturin nenin 13 synohet të ndalohet apo të frenohet e drejta e gazetarëve për të raportuar.
Partia Demokratike dhe LSI kanë qenë të ashpra, madje kanë thirrur për “komplot” në këtë drejtim.
Kurse kryetari i Komisionit të Posaçëm, Fatmir Xhafa, e ka cilësuar si mjet presioni.
Siç mësohet nga burime pranë Komisionit të Reformës, përmbajtja e nenit 13 synon që në rast një hetimi ndaj një “peshku të madh” të politikës nga Prokuroria Speciale, të mos ndodhë si ka ndodhur në të shkuarën në Shqipëri, ku palët duke përdorur mediat e tyre të sulmojnë hetimin dhe prokurorinë.
“Çdo lloj influence e papërshtatshme e ushtruar mbi punën e prokurorëve të posaçëm apo aktivitetin e tyre mbi çështje konkrete përmes mediave ndalohet dhe dënohet me ligj”.
Kjo është përmbajtja e nenit 13, i cili në fakt ka ardhur në draft si shtesë më datë 24 qershor për ta blinduar punën e Prokurorisë Speciale apo SPAK-ut.
Një ekspert që punon pranë Komisionit të Posaçëm të Reformës në Drejtësi, por që nuk donte të jepte prononcim zyrtar, tha se bëhet fjalë thjesht për një “rritje e imunitetit të Prokurorisë Speciale”. Që të mos ndodhë si në hetimet e mëdha, për Rrugën e Kombit, Gërdecin, 21 Janarit, videon Meta-Prifti apo edhe hetimeve ndaj Drejtorit të Policisë së Shtetit Haki Çako.
Ç’ndodhi në këto raste, thjesht për ta sjellë si shembull:
Në kohën kur Ina Rama ishte Prokurore e Përgjithshme, institucioni që ajo drejtonte nisi një sërë hetimesh të forta ndaj politikanëve të lartë.
Kryeprokurorja firmosi kërkesë për heqje imunitetesh ndaj dy ministrave të atëhershëm të qeverisë, Fatmir Mediut dhe Lulzim Bashës.
Pas kësaj kërkese, kryetarja e Kuvendit në atë kohë, Jozefina Topalli, nisi sulmin ndaj organit të akuzës duke e quajtur tendencioz.
Më pas, kryeministri Sali Berisha por edhe eksponentë të mazhorancës sulmuan njeriun që po merrej me drejtimi n e këtyre dosjeve, Drejtorin e Hetimit në Prokurori, Zamir Shtyllën.
E cilësuan si persekutor të regjimit komunist, edhe pse Shtylla kishte punuar dhe në kohën e qeverisjes së PD-së.
Pas këtij presioni të fuqishëm të mazhorancës ndodhi që drejtësia u step.
Dolën një nga një nga burgu: Mihal Delijorgji, titullari i kompanisë që kryente demontime në Gërdec ku u faktua se punonin dhe të mitur; Alban Guxholli, kunati i tij që ishte administrator i firmës; drejtori i MEICO, Ylli Pinari, i cili kishte firmosu kontratën me “fabrikën e vdekjes”; si dhe edhe titullarët e tjerë të Ministrisë së Mbrojtjes.
U mbyll gjithashtu hetimi me procedurë për Fatmir Mediun, ministër i Mbrojtjes në atë kohë.
Por 21 Janari shkaktoi kulmin, ku kryeministri e cilësoi Kryprokuroren e Republikës, Ina Rama si “lavire bulevardi” pasi kishte nisur një mandat hetim për krerët e Gardës së Republikës për të gjetur autorin e vrasjes së 4 personave në bulevardin para Kryeministrisë.
Gjithçka mori një trajtë politike dhe Ina Rama në vend që të hetonte nisi mbrohej nga sulmi qeveritar.
Të vijmë të rasti më fundit kur një gjykatë në Tiranë pezulloi nga detyra Drejtorin e Përgjithshëm të Policisë së Shtetit, Haki Çako, për të famshmen “çështje të përgjimeve”.
Kryeministri Edi Rama dhe ministri i Brendshëm Saimir Tahiri, e cilësuan gjykatësin që mori vendimin si “killer”.
Apeli e ktheu në detyrë Çakon dhe çështja u mbyll.
Por çdo të ndodhë në shtator kur Prokuroria Speciale të nisë punën?
Bëhet fjalë për hetime që do të trondisin në themel politikën shqiptare.
Dhe parashikohet që lobe të forta të politikës t’i kundërvihen ashpër dhe egër SPAK-ut dhe eksponentëve të saj.
Neni 13 synont vendosjen e një imuniteti për të parandaluar të paktën në letër këtë presion.
Por ky nen po kundërshtohet ashpër nga VIP-at e medias të cilët në kohën e vjedhjes më të madhe atë të Bankës së Shqipërisë mbrojtën dhe e mbajtën në prehër ish-Guvernatorin Adrian Fullani, i cili ligjërisht edhe pse i shkarkuar, rezulton i pafajshëm.
Të gjitha këto argument janë rreshtuar nga ndërkombëtarët, të cilët kanë bërë të ditur se kërkojnë një vullnet të qartë nga politika shqiptare pasi e kanë një të tillë nga populli.
Këto ditë pritet që të jepen mesazhe të reja nga dy përfaqësuesit e SHBA-së dhe BE-së në Tiranë, ambasadorëve Donald Lu dhe Romana Vllahutin. /tesheshi.com/
