Pasi liria e fjalës u kërcënua, miqtë e saj u arrestuan dhe ekonomia ruse u fundos për shkak të agresionit të Ukrainës nga Vladimir Putin, Marina paketoi valixhet dhe u largua nga Moska.
Por më shumë se një mijë kilometra larg, në shtëpinë e saj të re në Serbi, agjentja e udhëtimeve 41-vjeçare nuk mund t’i shpëtojë krahut të gjatë të propagandës ruse, ku lufta e Kremlinit ka pasur mbështetje të gjerë. “Disa më thonë se mbështesin Rusinë kur mësojnë se jam nga Rusia. Ata thonë se do të shprehnin mbështetjen e tyre, por del se kjo mbështetje shtrihet në mbështetjen e Putinit dhe luftës”, thotë Marina, tashmë me banim në Beograd, e cila kërkoi që mbiemri i saj të mos publikohej.
Në javët pas pushtimit, për shumë rusë që donin të iknin jashtë vendit, Serbia u bë një strehë sepse është një nga vendet e pakta që ofron fluturime të rregullta drejt Evropës për shkak të ndalimit masiv të fluturimeve drejt Rusisë në të gjithë kontinentin.
Një numër i madh i rusëve që mbërritën në Serbi në fakt i shpëtuan situatës katastrofike në Rusi të shkaktuar nga agresioni i Putinit në Ukrainë.
Megjithatë, shumica e popullsisë serbe, ndryshe nga pjesa tjetër e Evropës, vazhdon të mbështesë luftën e Putinit kundër Perëndimit në Ukrainë, siç e përshkroi ajo.
Pjesa më e madhe e mbështetjes për Putinin buron nga urrejtja kolektive ndaj NATO-s, e cila bombardoi Serbinë në 99-ën për shkak të Kosovës.
Mijëra protestues dolën në rrugë në Beograd për të shprehur mbështetjen e tyre për Putinin dhe për të dënuar NATO-n, ndërkohë që qeveria serbe, edhe pse dënoi agresionin rus në Kombet e Bashkuara, ka refuzuar të vendosë sanksione ndaj Moskës. Marina tha se bisedat e saj me mbështetësit e Putinit në Serbi shpesh i shkaktojnë zemërim, dëshpërim apo turp.
“Rezulton se ata janë bombarduar nga propaganda ruse dhe besojnë vërtet se imazhet e qyteteve të shkatërruara dhe të njerëzve të vdekur në Ukrainë janë false. Dhe kjo mënyrë e të menduarit është aq e fortë sa nuk besoj se mund të bëj gjë, ndaj heq dorë dhe e mbyll bisedën”, tha Marina.
Jakov Borevich, një ekspert i IT, tha se ai zgjodhi Beogradin për shkak të “mentalitetit” të tij dhe “afërsisë së kulturës” me Rusinë, por gjithashtu luftoi me ndjenjat pro-ruse në rrugë, duke përfshirë muralin e Putinit pranë banesës së tij të re, ku ai quhet “vëllai “. /tesheshi.com/
