Gjykata e Posaçme nuk ka të bëjë me ndjekjen penale të UÇK-së, deklaroi shefi i Zyrës se BE-së në Kosovë, Samuel Zhbogar per vendimin të djeshëm të qeverisë kosovare për miratimin e Propozimt për amendamentimin e Kushtetutës së Republikës së Kosovës.
“Ne përgëzojmë Qeverinë e Kosovës për vazhdimin e përkushtimit ndaj Gjykatës së Posaçme, e inicuar nga Shkëmbimi i Letrave dhe të miratuar nga Kuvendi. Gjykata e Posaçme nuk ka të bëjë me ndjekjen penale të Ushtrisë Çlirimtare të Kosovës por me përcaktimin e përgjegjësisë penale të individëve. Vendimi i sotëm rikonfirmon përkushtimin e autoriteteve të Kosovës për të larguar një re të zezë që po qëndron mbi Kosovë që nga publikimi i raportit të Këshillit të Evropës i vitit 2011”, theksohet në deklaratën e Zhbogar, të dërguar mbrëmë.
Gjatë ditës së djeshme, ambasada e SHBA-ve në Kosovë mirëpriti kalimin nga ana e Qeverisë të amandamenteve kushtetuese që janë të nevojshme për themelimin e Gjykatës Speciale. “Ky është një hap i rëndësishëm drejt përmbushjes së zotimeve që Kosova i ka bërë në prill të vitit 2014 me rastin e Shkëmbimit të Letrave me BE-në. Kjo poashtu tregon gatishmërinë e Kosovës për të adresuar akuzat kundër individëve nga raporti i vitit 2011 i Këshilit të Evropës. Përpjekjet e qeverisë do t’i mundësojnë Kosovës që të ecë përpara, dhe përkrahja për gjykatën do tregojë përkushtimin e vazhdueshëm të Kosovës ndaj sundimit të ligjit”, theksonte deklarata e dërguar, pas mbledhjes së qeverisë.
Qeveria kosovare, e drejtuar nga kryeministri Isa Mustafa, në mbledhjen e mbajtur të shtunën ka miratuar Propozimin për amendamentimin e Kushtetutës së Republikës së Kosovës.
“Me këtë amendamentim po përmbushen obligimet që ka marrë qeveria nga Kuvendi i Kosovës vitin e kaluar, për themelimin e Gjykatës Speciale”, ka thënë Zëvendëskryeministri i parë, Hashim Thaçi.
Në mbledhjen e qeverisë u theksua se, amendamentimet e reja përfshijnë ndryshimet që dalin nga përmbushja e obligimeve ndërkombëtare, në lidhje me Raportin e Asamblesë së Përgjithshme dhe të Këshillit të Evropës, Dokumenti 12462, datë 7 janar 2011. Sipas kësaj, Republika e Kosovës mund të themelojë Dhoma të Specializuara, me Zyre të Prokurorit të Specializuar, në kuadër të sistemit të drejtësisë të Republikës së Kosovës. Organizimi, funksionimi dhe juridiksioni i Dhomave të Specializuara dhe Zyrës së Prokurorit të Specializuar rregullohet edhe me një ligj të veçantë.
“Është një obligim që e kemi marrë karshi bashkësisë ndërkombëtare edhe me letërkëmbimin e Presidentes së Kosovës me Baroneshën Ashton. Ne e kemi vlerësuar, dhe e vlerësojmë edhe sot se është vendim i drejtë kryerja e këtyre obligimeve, në mënyrë që të zbardhet e vërteta rreth pretendimeve të padrejta që iu kanë bërë Kosovës, dhe Kosova ta heq këtë barrë të rëndë nga supet e veta, apo këtë re të zezë që po qëndron mbi shtetin e Kosovës. Prandaj, duke marrë parasysh këto rrethana, dhe obligimet që dalin nga qëndrimi dhe vendimi i Kuvendit të Kosovës, mendojmë që Qeveria e Kosovës të dërgoj në Kryesi të Kuvendit dhe pastaj Kryesia e Kuvendit në Gjykatën Kushtetuese amendamentimin e Kushtetutës së Republikës së Kosovës”, ka theksuar zëvendëskryeministri Thaçi.
Në mbledhjen e qeverisë u miratua edhe Projektligji për mbrojtjen juridike dhe mbështetjen financiare të personave të akuzuar potencial në proceset gjyqësore pranë Dhomave të Specializuara.
“Qëllimi kryesor i këtij projektligji është mbrojtja juridike dhe mbështetja financiare e personave të akuzuar potencialë në proceset gjyqësore dhe procedura të ndërlidhura për krimet e pretenduara pranë Dhomave të Specializuara”, tha zëvendëskryeministri Thaçi.
Në diskutimin këtë javë në Forumin Fol Hapur, kryeministri Isa Mustafa lidhur me formimin e Gjykatës Speciale deklaroi se qeveria që ai udhëheq ka dhënë përkushtim maksimal për themelimin e kësaj Gjykate. “Ne do të procedojmë propozimet për ndryshimin e Kushtetutës, Ligjin për këtë Gjykatë dhe Statutin e saj, e cila hapë mundësinë për themelimin e kësaj gjykate. Kjo çështje nuk është e lehtë, mendoj se nuk është çështje e drejtuar ndaj luftës së UÇK-së, por ndaj individëve të caktuar”,tha ai.
Nesër, mbahet mbledhja e Kryesisë së Kuvendit të Kosovës për përgatitjet për seancë plenare të radhës.
