Deputeti i LDK-së, Arben Gashi, u shpreh se situata e krijuar pas ndërprerjes së sotme të seancës konstituive shtyn koalicionin e tyre të veprojë sipas rrethanave të reja ligjore.
Ai ka bërë të ditur se janë duke shqyrtuar mundësinë për zhbllokimin e situatës duke zgjedhur nënkryetarët e Kuvendit, për të pritur më pas koalicionin PAN që të propozojë emrin për Kryetarin.
“Sjellja e PDK-së me aleatë është një sjellje bllokuese. LDK po shqyrton mundësitë alternative për të parë se si mund të zgjidhet kjo situatë. Ne po shqyrtojmë seriozisht procedimin në Kuvend në mungesë të PAN-it.
Duhet të shohim mundësinë e vazhdimit të seancës duke zgjedhur nënkryetarët e Kuvendit, derisa PDK të jetë e gatshme të vijë në Kuvend. Po shqyrtojmë mundësitë ligjore lidhur me këtë gjë. Rrethanat janë që duhet të krijojmë një gjendje të re”, tha Gashi.
Duke iu referuar ultimatumit të kreut të AKR-së Behgjet Pacollit, ai u shpreh se LDK-ja është e interesuar që zgjidhja të bëhet më shpejt se sa 10 ditë. /tesheshi.com/
